Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre.
Një rast i rëndë ka ndodhur mbrëmë në një familje në Shtime, ku një vajzë po dyshohet se ka ushtruar dhunë ndaj babait të saj.
Viktima e ka denoncuar rastin në Polici, ku ka deklaruar se e bija e ka sulmuar fizikisht, pas një mosmarrëveshje që kanë pasur mes vete.
Si pasojë e dhunës, ai ka pësuar lëndime trupore dhe ka kërkuar tretman mjekësor në spital, ndërkohë që e dyshuara është arrestuar dhe është shoqëruar në stacion policor.
Me urdhër të Prokurorit të Shtetit, e dyshuara është dërguar në mbajtje dhe ndaj saj është iniciuar rasti nën dyshimet për kryerjen e veprës penale ‘Dhunë në familje’.