Presidentja e Kosovës, Vjosa Osmani, ka udhëtuar drejt Çekisë, ku do të takohet edhe me Ministrin e Punëve të Jashtme të Holandës, Wopke Hoekstra, për ta bindur për liberalizimin e vizave për Kosovën.
Sipas njoftimit të Presidencës, në takimet që do të zhvillojë në Çeki, shtet ky që aktualisht udhëheq me presidencën e Këshillit të Bashkimit Evropian, Osmani do ta adresojë në veçanti çështjen e liberalizimit të vizave për Kosovën dhe avancimin e agjendës evropiane të vendit tonë.
“Çekia aktualisht udhëheqë me presidencën e Këshillit të Bashkimit Evropian, prandaj në këto takime, Presidentja do ta adresojë në veçanti çështjen e liberalizimit të vizave për Kosovën dhe avancimin e agjendës evropiane të vendit tone”, thuhet në njoftim.
Ndryshe, Parlamenti Evropian dhe Komisioni Evropian ka kohë që kanë konstatuar se Kosova ka plotësuar kushtet për liberalizim të vizave. Dy shtete të mëdha të BE-së të cilat vazhdojnë të jenë skeptike për atë nëse kosovarët duhet të lëvizin pa viza në Zonën Schengen janë Franca dhe Holanda.
Komunikata e plotë:
Presidentja e Republikës së Kosovës, Vjosa Osmani, ka udhëtuar zyrtarisht për në Çeki ku do të zhvillojë një sërë takimesh me zyrtarë të lartë shtetëror të Çekisë si dhe do të marrë pjesë në konferencën ndërkombëtare të Forumit 2000, së bashku me liderë të tjerë botëror.
Çekia aktualisht udhëheqë me presidencën e Këshillit të Bashkimit Evropian, prandaj në këto takime, Presidentja do ta adresojë në veçanti çështjen e liberalizimit të vizave për Kosovën dhe avancimin e agjendës evropiane të vendit tonë.
Presidentja Osmani, ndër të tjera, do të takohet me kryeministrin çek z. Petr Fiala, me presidentin e Senatit Çek, z. Miloš Vystrčil si dhe me zv.kryeministrin, njëherësh ministër për punë të jashtme të Holandës, z. Wopke Hoekstra.
Në kuadër të kësaj vizite, Presidentja Osmani do të marrë pjesë dhe do të flasë në konferencën ndërkombëtare të Forumit 2000 me temë: Rreziku i qartë dhe i tashëm i demokracisë: si të përgjigjemi.
Fondacioni Forum 2000, vazhdon trashëgiminë e ish-presidentit çek, Vaclav Havel në mbështetje të vlerave demokratike, respektimit të të drejtave të njeriut, si dhe duke ndihmuar në zhvillimin e shoqërisë civile dhe inkurajuar tolerancën kulturore dhe etnike.
Presidentja Osmani në këtë Konferencë do të mbajë dy fjalime si dhe do të marrë pjesë edhe në disa aktivitete të tjera.
