Ambasadorët e ShBA-së, Francës, Gjermanisë, Mbretërisë së Bashkuar dhe Italisë përmes një deklarate të përbashkët kanë përkujtuar 21 vjetorin e Masakrës së Reçakut.
Në deklaratën e ambasadorëve thuhet që Masakra e Reçakut bëri që NATO-ja të ndërhyjë në Kosovë.
“Njëzet e një vjet më parë, masakra që ndodhi në Reçak përfundimisht bëri që aleatët e NATO-s të ndërhyjnë dhe ti japin fund një katastrofë humanitare”, thuhet në deklaratën e tyre.
Tutje në deklaratë thuhet që nderojnë kujtimin e atyre që humbën jetën në Reçak dhe masakrat e tjera në Kosovë.
“Ne e nderojmë kujtimin e atyre që humbën jetët në Recak dhe masakrat e tjera në Kosovë dy dekada më pare, duke punuar së bashku për të ndërtuar një të ardhme të paqes, drejtësisë dhe mirëqenies për brezat e ardhshëm”, thuhet në deklaratën e shteteve të QUINT-it.
Ata i kanë bërë thirrje qeverisë së Kosovës dhe të Serbisë që të sigurojnë qasje të plotë familjeve në drejtësi dhe informatat në fatin e viktimave.
“Qeveria e Kosovës dhe qeveria e Serbisë duhet të sigurojnë që viktimat dhe familjet e tyre kanë qasje të plotë në drejtësi dhe në informatat për fatin e më të dashurve të tyre”, thuhet në deklaratën e tyre.
Shtetet e QUINT-it kanë thënë po ashtu se qytetarët e të gjitha etnive duhet të ndjehen të lirë që të jetojnë në paqe.
“Qytetarët e të gjitha etnive dhe besimeve ndjehen si në shtëpi dhe të lirë për të jetuar, punuar dhe besuar në paqe me fqinjët e tyre. Siç edhe thotë Deklarata e Pavarësisë së këtij vendi, Kosova është një vend “i përkushtuar për të përballuar trashëgiminë e dhimbshme të së kaluarës së fundit në një frymë pajtimi dhe faljeje. Të përkushtuar për mbrojtjen, promovimin dhe nderimin e larmisë së popullit tone”, thuhet tutje.
Ambasadorët e shteteve mike të Kosovës kanë deklaruar se “qëllimi ynë i përbashkët është të mbështesim vazhdimisht Kosovën në këtë rrugë”.