Opozita ka vijuar të martën me bllokimin e punës së komisioneve në kryesinë e kuvendit në Shqipëri.
Deputet e PD-së kanë vendosur një barrikadë me karrige te komisioni i sigurisë kombëtare, duke mos lejuar zhvillimin e mbledhjes, shkruan Euronews.al.
Një moment, deputetja e PS-së Blerina Gjylameti që ka tentuar të hyjë në komision, por është hasur me barrikadën e deputetëve demokratë, është përplasur fizikisht me deputeten e PD-së Elda Hoti.
Kjo situatë vijon në kryesinë e Kuvendit prej disa ditësh çka ka bërë që një pjesë e komisioneve të zhvillojnë mbledhje vetëm online.
Opozita e cilëson në kundërshtim me rregulloren vendimin për të zhvilluar online mbledhjet e komisioneve.
Sipas tyre kjo është një shkelje e rëndë e Kushtetutës në kohën kur në komisione diskutohet buxheti i vitit të 2024.