Moska zyrtare shpreson se shpallja “non grata” e zyrtarit rus të Organizatës së Kombeve të Bashkuara që është me mision në UNMIK në Kosovë, do të marrë përgjigjen e merituar nga Kombet e Bashkuara.
Kështu ka deklaruar Maria Zakharova, zëdhënësja e Ministrisë së Punëve të Jashtme të Rusisë.
“Ne presim që ky arbitraritet i Prishtinës të marrë një përgjigje të duhur kategorike nga udhëheqja e OKB-së”
“Ne i bëjmë thirrje Misionit të Administratës së Përkohshme të Kombeve të Bashkuara në Kosovë (UNMIK) dhe Forcës Paqeruajtëse Ndërkombëtare të Kosovës (KFOR) që të garantojnë sigurinë e rusëve dhe të gjithë anëtarëve të misionit të OKB-së, brenda autoritetit të tyre sipas rezolutës së Këshillit të Sigurimit të OKB-së”, tha diplomatja ruse.
Tutje, Zakharova ka thënë se shpallja “person non grata” e një anëtari të Misionit të Administratës së Përkohshme të OKB-së në Kosovë është “vazhdimësi e linjës provokuese që synon përkeqësimin e marrëdhënieve ndëretnike”.
“Ne e konsiderojmë një marifet tjetër të Prishtinës si vazhdim të linjës provokuese për përkeqësimin e marrëdhënieve ndëretnike, duke diskredituar organizatën botërore dhe, së fundi, por jo më pak e rëndësishme, rolin konstruktiv të Rusisë në Ballkan”.
Diplomatja ruse ka nënvizuar se “Rusia dënon hapat e marrë nga Kosova”, të cilët ajo i quajti “agresiv”.
“Ne dënojmë fuqishëm çdo përpjekje për të kufizuar operacionin e misionit të OKB-së ose për ta ‘shtrydhur atë’ nga Kosova duke ndërmarrë hapa agresivë që bien ndesh me frymën dhe shkronjën e Rezolutës 1244 të Këshillit të Sigurimit të OKB-së”, shtoi Zakharova.