Prezantuesi i CNN, Don Lemon, ka sulmuar median botërore CNN-in pas shkarkimit të tij, i cili erdhi pas akuzave për sjellje të pahijshme.
Ai u shpreh se është i habitur për largimin e tij pa paralajmërim nga puna.
“Pas 17 vitesh në CNN do të kisha menduar se dikush në menaxhim do të kishte pasur mirësjelljen të më thoshte drejtpërdrejt”, shkroi Lemon në Twitter. “Në asnjë moment nuk më është dhënë asnjë indikacion se nuk do të mund të vazhdoja të bëja punën që kam dashur në rrjet.”
Ndërkaq, CNN tha vetëm se u ndanë rrugët me Lemon, i cili bashkë-drejtoi emisionin e tij të mëngjesit, duke shtuar se i urojnë fat.
Lemon ishte së fundmi bashkë-prezantues i programit “This Morning” të CNN. Por ai u kritikua gjerë në fillim të këtij viti pas komenteve që bëri për kandidaten republikane për presidente Nikki Haley. Ai kishte thënë se republikanja Nikki Haley, 51 vjeçe, nuk ishte “në kulmin e saj”.
“Kur një grua konsiderohet të jetë në kulmin e saj – në të 20-at, 30-at dhe ndoshta të 40-at e saj,” tha Lemon, një vërejtje që u dënua gjerësisht si seksiste.
Pas kundërshtimeve nga bashkë-prezantueset e tij femra, Poppy Harlow dhe Kaitlan Collins, ai ishte kundërpërgjigjur se deklarata e tij ishte një fakt.
“Unë thjesht po them se cilat janë faktet – Google-it,” ka shtuar ai.
Mirëpo, në të njëjtën ditë Lemon lëshoi një deklaratë duke thënë se i vinte keq për komentet e tij dhe gjithashtu kërkoi falje në redaksi.
Por këto deklarata shkaktuan kritika të gjera, duke përfshirë edhe nga aktorja Michelle Yeoh, 60 vjeç, e cila në fjalimin e saj për marrjen e çmimit Oscar muajin e kaluar u duk se iu referua komenteve të Lemon duke thënë: “Zonja, mos lejoni askënd t’ju thotë se keni kaluar ndonjëherë kulmin”.
Në anën tjetër, një postim në Twitter të hënën nga Nikki Haley u duk se i’u drejtua shkarkimit të moderatorit, duke e quajtur atë një “ditë të shkëlqyer për gratë kudo” dhe duke shtuar togfjalëshin”#StillInMyPrime”.
Reputacioni i Lemonit u turbullua edhe më tej nga një raport nga media Variety në prill, i cili detajonte akuzat për sjellje mizogjene ndaj kolegëve të tij të CNN. Variety raportonte se Lemon e quajti një producent të trashë në fytyrë, u tall dhe imitoi një kolege dhe dyshohet se i dërgoi mesazhe kërcënuese një tjetri.
Lemon gjithashtu është përballur me polemika vjeshtën e kaluar pasi ka thënë se ekipi i futbollit amerikan për meshkuj duhet të paguhet më shumë se ai i femrave, duke shtuar se meshkujt ishin “më interesantë për t’u parë”.
Lemon erdhi në CNN në 2006 pasi punoi për një stacion lokal NBC në Çikago. Për më shumë se tetë vjet, ai drejtoi shfaqjen kryesore Don Lemon Tonight. Ai u largua për të bashkëprezantuar “CNN This Morning” nëntorin e kaluar, ndërkaq tashmë emisioni i mëngjesit “CNN This Morning” do të vazhdojë rrugëtimin me prezantueset Harlow dhe Collins.
