NATO nuk do të reduktojë mbështetjen për Ukrainën, tha Sekretari i Përgjithshëm Jens Stoltenberg në një konferencë për shtyp të premten.
“Shumica e luftërave përfundojnë me negociata”, tha Stoltenberg, duke folur përpara një takimi të ministrave të jashtëm të NATO-s, i cili do të zhvillohet në Bukuresht, Rumani, në fund të nëntorit.
“Por ajo që ndodh në tryezën e bisedimeve varet nga ajo që ndodh në fushën e betejës. Prandaj, mënyra më e mirë për të rritur shanset për një zgjidhje paqësore është mbështetja e Ukrainës”, shtoi ai.
“Kështu që NATO do të vazhdojë të qëndrojë me Ukrainën për aq kohë sa të duhet. Ne nuk do të tërhiqemi”, tha Stoltenberg, raporton cnn.
NATO ka ofruar karburant, pajisje mjekësore, pajisje dimërore dhe bllokues të dronëve, sipas Stoltenberg.
Ai tha se vendimet për dërgimin e sistemeve të mbrojtjes ajrore Patriot të prodhuara nga SHBA në Ukrainë janë “vendime kombëtare” për vende specifike, kur u pyet në lidhje me kërkesën e Varshavës që Gjermania të dërgojë njësi Patriot në Ukrainë dhe jo në Poloni. Oferta e Gjermanisë për Poloninë erdhi pas një sulmi vdekjeprurës raketor në territorin polak pranë kufirit ukrainas më 15 nëntor.
Stoltenberg tha se në të kaluarën, me sistemin e avancuar të mbrojtjes ajrore NASAMS, trajnimet kryheshin në vendet aleate të NATO-s nga personeli i NATO-s. Megjithatë, asnjë personel i NATO-s nuk ka kryer punë brenda Ukrainës, pasi kjo do të thoshte se NATO ishte palë në konfliktin Rusi-Ukrainë.
Ai shtoi se ndonjëherë marrëveshjet e përdoruesve përfundimtarë dhe marrëveshjet e tjera nënkuptonin se kërkohej konsultimi me aleatët e tjerë, por përfundimisht vendimi duhet të merret nga qeveritë kombëtare./Prishtinapress/
