Sekretari i Përgjithshëm i NATO-s, Mark Rutte, ka thënë se presidenti ukrainas Volodymyr Zelenskyy duhet të ndalojë kritikat e tij “të padrejta” ndaj kancelarit gjerman Olaf Scholz për refuzimin e Berlinit për të furnizuar Kievin me raketa Taurus me rreze të gjatë.
Gjermania ka qenë një nga aleatët më të mëdhenj të Ukrainës që nga pushtimi i plotë i Rusisë në vitin 2022 — është e dyta pas ShBA-së në aspektin e ndihmës financiare dhe ushtarake dhënë Kievit — por hezitimi i saj për të ofruar raketat Taurus ka qenë një çështje e diskutueshme për Zelenskyy-n.
“Unë shpesh i kam thënë Zelenskyy-t që duhet të ndalojë së kritikuari Olaf Scholz, sepse mendoj se është e padrejtë”, tha Rutte për agjencinë gjermane të lajmeve dpa në një intervistë të publikuar të hënën.
Ndërsa Franca, Britania e Madhe dhe ShBA-ja kanë dërguar në muajt e fundit armë me rreze më të gjatë që mund të godasin thellë në territorin rus, Scholz ka refuzuar kërkesat e Zelenskyy-t për raketat Taurus për shkak të “rrezikut të madh të eskalimit” me Rusinë.
Rutte tha se, ndryshe nga Scholz, ai do t’i ofronte Ukrainës raketat dhe nuk do të vendoste asnjë kufizim për përdorimin e tyre.
“Po tërësisht, ne e dimë që aftësitë e tilla janë shumë të rëndësishme për Ukrainën”, tha Rutte në intervistë, duke shtuar se nuk ishte në dorën e tij të vendoste se çfarë duhet të dërgojnë aleatët.
Zelenskyy kritikoi publikisht Scholz muajin e kaluar për zhvillimin e një bisede telefonike me presidentin rus Vladimir Putin, duke thënë se kjo kishte hapur “kutinë e Pandorës” dhe kishte minuar përpjekjet për të izoluar Moskën dhe për të përfunduar konfliktin me një “paqe të drejtë”, shkruan Euronews.com, përcjell Klankosova.tv.