Një fëmijë njëvjeçar ka vdekur në një çerdhe në New York si pasojë e konsumimit të drogës Fentanyl, i cili konsiderohet 50 herë më i fuqishëm se heroina, raportoi të mërkurën BBC-ja.
Sipas policisë, fëmija tashmë i ndjerë e ka konsumuar drogën pasi ishte e fshehur në dhomën e gjumit nën një dyshek ku ai po flinte.
Tre fëmijë të tjerë janë shtruar në spital pasi u ekspozuan ndaj lëndës narkotike të fuqishme në qendrën e kujdesit ditor në Bronx.
Ndaj dy personave janë ngritur akuza lidhur me rastin.
Hetuesit kanë njoftuar se gjithashtu kanë zbuluar tre presa të përdorura për të paketuar kilogramë droge.
Pronarja e çerdhes “Divino Nino” në Bronx, Grei Mendez, dhe qiramarrësi i saj, Carlisto Acevedo Brito, po përballen me akuza për posedim narkotikësh “me qëllim shpërndarjen që rezulton në vdekje dhe komplot për shpërndarjen e lëndëve narkotike që rezultojnë në vdekje”.
Autoritetet thonë se droga e gjetur nga çerdhja mund të kishte vrarë 500 mijë njerëz.
Sipas prokurorëve, Mendez gjithashtu dyshohet se ka fshirë rreth 20,000 mesazhe nga telefoni i saj para arrestimit.
Autoritetet janë ende në kërkim të bashkëshortit të saj, i cili në dokumentet e gjykatës është identifikuar si bashkëpunëtor. Sipas policisë ai u kap nga kamerat duke u larguar nga vendi i ngjarjes pasi ka ndodhur rasti.
Një avokat i Mendezit ka thënë se klientja e tij i mohon akuzat dhe nuk ishte në dijeni se droga mbahej në çerdhe.
