Sekretari i Jashtëm britanik David Lammy dhe Sekretari i Mbrojtjes John Healey kanë qenë në një vizitë në Lindjen e Mesme – përfshirë Libanin.
Si pjesë e kësaj vizite, të dy ministrat e kabinetit kanë bërë thirrje për de-përshkallëzimin e tensioneve në Vijën Blu – vijën e demarkacionit që ndan Izraelin dhe Libanin.
“Kjo është një kohë shqetësuese për njerëzit në Liban: ata kanë kaluar shumë në pesë vitet e fundit, duke përfshirë shpërthimin e tmerrshëm të portit që mori kaq shumë jetë”, tha Lammy.
“Unë jam këtu në terren duke u takuar me figura me ndikim për të bërë thirrje për de-përshkallëzimin e menjëhershëm në rajon”, shtoi ai.
“Kam ngritur shqetësimet e mia për tensionet e vazhdueshme midis Libanit dhe Izraelit dhe kam theksuar vendosmërinë e Mbretërisë së Bashkuar për të shmangur llogaritjet e gabuara”.
Healey tha se de-përshkallëzimi duhet të jetë fokusi kryesor pasi ky rajon ndodhet në një udhëkryq.
Ai tutje vlerësoi se humbja e jetëve të pafajshme në javët dhe muajt e fundit është e padurueshme. “Kjo duhet të marrë fund”, tha Healey, raporton Sky News, transmeton Klankosova.tv.
“Të gjitha palët duhet të tërhiqen nga konflikti dhe të rrisin diplomacinë. Ne do të punojmë me partnerë të rëndësishëm si Katari ndërsa qeveria jonë udhëheq një shtytje të përtërirë për paqe”, shtoi ai.
