Kancelari gjerman, Olaf Scholz premtoi të shtunën ndihmën e vazhdueshme financiare dhe ushtarake për Ukrainën ndërsa ajo përpiqet të pastrojë tokën e saj nga pushtuesit rusë, duke thënë se do të merren vendime që i mundësojnë Gjermanisë të vazhdojë mbështetjen e saj.
Vërejtjet e Scholz në një konferencë partie të socialdemokratëve të tij të qendrës së majtë (SPD) vijnë pasi qeveria e tij e koalicionit përballet me probleme të mëdha për të gjetur para të mjaftueshme për të financuar planet e shpenzimeve të qeverisë për vitin 2024 pas një vendimi historik të gjykatës.
Lufta në Ukrainë “ndoshta nuk do të përfundojë së shpejti”, tha Scholz, duke shtuar se kjo e bënte të rëndësishme që Gjermania të vazhdojë të jetë në një pozicion “të vazhdojë të mbështesë Ukrainën në luftën e saj për të mbrojtur veten”, raporton DeutcheWelle në gjuhën angleze.
Kancelari tha se Rusia kishte braktisur të gjithë konsensusin e mëparshëm në lidhje me paqen dhe sigurinë në Evropë kur pushtoi Ukrainën në vitin 2022 dhe se duhej bërë e qartë se “kufijtë në Evropë nuk mund të lëvizen më me forcë”.
Scholz tha se presidenti rus, Vladimir Putin nuk duhet të llogarisë ndonjë zbehje të ndihmës gjermane për Ukrainën.
Pas hezitimit fillestar, Gjermania ka dorëzuar sasi të mëdha armësh në Ukrainë, duke përfshirë tanke dhe artileri të rëndë, dhe tani konsiderohet si kontribuuesi i dytë më i madh në përpjekjet e Kievit për luftë, pas ShBA-së.
Scholz premton të vazhdojë ndihmën financiare ushtarake për Ukrainën
