Sekretari i përgjithshëm i NATO-s, Mark Rutte, ka deklaruar se i ka kërkuar Vuçiqit llogaridhënie për sulmin në Banjskë dhe për sulmet ndaj ushtarëve të KFOR-it në veri të Kosovës.
Ai tha se këtë ia ka kumtuar edhe presidentit serb, Aleksandër Vuçiq, gjatë takimit të fundit me të.
“Nuk e bëra një lidhje direkte me situatën në Kosovë, sepse mendoj se KFOR-i është i rëndësishëm, forcat e BE-së në Bosnje dhe Hercegovinë janë të rëndësishme, ato punojnë ngushtë së bashku, prandaj situata e sigurisë në Kosovë është shumë e rëndësishme për ne”, ka thënë Rutte në një konferencë për media.
“Duhet të sigurohemi që stabiliteti i arritur që nga viti 1999 të vazhdojë. Sa u përket ngjarjeve në Banjskë dhe sulmit ndaj forcave të NATO-s në vitin 2023, serbët duhet të punojnë për të mbajtur përgjegjësi”.
“Kjo ishte tema e diskutimit tonë me presidentin Vuçiq në telefon, si dhe gjatë darkës që kishim në Bruksel dy javë më parë”, ka thënë Rutte në këtë konferencë për media.