Kryetari i Odës Ekonomike të Kosovës, Lulzim Rafuna, ka deklaruar se për sektorin privat kjo nuk do të ketë asnjë ndikim në hyrjen në fuqi të Ligjit për pagën minimale.
Gjatë një interviste në emisionin “60 Minuta” në KTV, Rafuna gjithashtu shprehu shqetësim në lidhje me mungesën e dialogut publiko-privat dhe moskonsultimit me sektorin privat.
“Sa i përket sektorit privat nuk ka asnjë impakt sepse sot në sektorin privat 99% të rasteve nuk mund të gjesh pagë më të ulët se 250 euro. Sa i përket ndryshimit të shkallëve tatimore kjo nuk e prek biznesin. Te bizneset e vogla ka efekt pozitiv. Brengosëse ka qenë se kemi mësuar prej mediave dhe kjo është shumë brengosëse se po vazhdon praktika e mospasjes së dialogut publiko-privat dhe moskonsultimit me sektorin privat”, ka thënë ai në emisionin “60 Minuta”.
