Vesel Veseli, ish-zëvendësshef i hetimeve të Policisë në Drenas, po akuzohet nga prokuroria se për rreth dy vite e kishte keqpërdorur seksualisht viktimën e moshës së mitur, shkruan prishtinapress.eu
Bashkë me të, prokuroria po e akuzon edhe gjinekologun Fehmi Ahmeti, i cili dyshohet se ka performuar abortin e vajzës së abuzuar nga Drenasi, e cila kishte ngelur shtatzënë pas abuzimit nga zyrtari policor.
Viktima, dyshohet se paraprakisht ishte abuzuar seksualisht edhe nga profesori i saj, Shkëlzen Xhekaj, i cili po ashtu u arrestua nga Policia e Kosovës.
E arrestimet lidhur me rastin në fjalë nuk kishin të ndalur. Më vonë, IPK arrestoi edhe avokatin Gazmend Halilaj, i cili fillimit edhe e kishte denoncuar rastin e abuzimit.
“I dyshuari me inicialet G.H u arrestuar me dyshimin se i njëjti ka kryer veprat penale “keqpërdorim i detyrës zyrtare”- neni 422, “keqpërdorim seksual duke keqpërdorur pozitën zyrtare apo profesionin”- neni 239 dhe veprës penale “frikësim gjatë procedurës penale” nga neni 395 i Kodit Penale të Kosovës”, thuhej në njoftim.
Prokuroria Themelore e Prishtinës nuk e ka ende gati aktakuzën për personat e dyshuar të përfshirë në këtë rast.
Prokurori, Ibrahim Berisha, tha sot për lajmi.net se janë ende në fazën e hetimeve dhe mbledhjen e informacioneve.
Siç bëri të ditur ai, prokuroria është duke intervistuar ende palë të cilat dyshohet të jenë përfshirë në këtë skandal.
“Prokuroria është ende në fazën e hetimeve dhe mbledhjes së informacioneve. Aktualisht janë duke u intervistuar palë të cilat dyshohet se janë të përfshira në këtë rast. Besoj që pas përfundimit të këtyre proceseve do të dalim me një aktakuzë”, ka thënë shkurt Berisha
Rasti i abuzimit të 16 vjeçares në Drenas kishte shkaktuar reagime të mëdha në opinion.
Në lidhje me këtë, në Drenas e në Prishtinë ishin organizuar edhe protesta, teksa prishtinapress.eu kishte raportuar nga afër për këto ngjarje.
Me kërkesë të prokurorisë, Gjykata u ka caktuar 1 muaj paraurgim ish-zyrtarit policor, profesorit dhe avokatit Gazmend Halilaj, ndërkaq gjinekologut Fehmi Ahmeti i është caktuar masa e arrestit shtëpiak prej 30 ditësh.
