Një rrëfim i jashtëzakonshëm nga Lufta e Kosovës, e ka sjellë ish-komandanti i UÇK-së në Koshare, Rrustem Berisha.
Berisha ka rrëfyer historinë e një ushtari i cili u vra në Betejën e Koshares, vetëm 17 minuta para se ta takojë babanë e tij, të cilin s’e kishte parë shtatë vjet, ngase kishte jetuar në Gjermani.
Ai thotë se i riu kishte ardhur nga Gjermania dhe iu ishte bashkuar radhëve të UÇK-së pa dijeninë e prindërve që jetonin në Kosovë.
Komandanti i Koshares thotë se prindi me të dëgjuar fjalë mbas fjale se djali i ishte bashkuar UÇK-së kishte ardhur për vizitë në frontet e luftës ngase ishte përmalluar për të.
“17 minuta pas asaj bisede, ai ushtar vritet në front. Kur më kumtuan atë lajm më është dukur sikur 1 mijë kilogram më ranë mbi kokë. E kemi pasur shumë të vështirë t’ua komunikojmë familjarëve se djali i është vrarë në luftë. I urdhërova njerëzit e afërt të stafit t’ia kumtojnë lajmin prindit. Luftë është dhe në luftë njerëzit vriten, s’ke çfarë bën”, tregon Berisha në RTK.
“Asnjëri nuk pranuan “jo nuk mundem”, dhe u detyrova vet ta jap lajmin te babai i tij. Kur shkova me prezantuan, ai më përqafoi, më shtrëngonte. Gjatë shtrëngimit të tij, mendohesha se çfarë lajmi do t’i japë prindit. U ulem dhe ai po më thotë: ”Komandant ju kam shqetësuar, por shtatë vite nuk e kam parë djalin. Mezi po pres ta takojë””, tregon momentin e sikletshëm Rrustem Berisha.
“I thashë: Burrë, edhe ty si shumë baballarëve tjerë iu ka rënë në hise, djali të është vrarë derisa ka qenë duke pritur për këtë takim. U krijua një heshtje për rreth një minutë. Kur njeriu flet t’i di sit ë pozicionohesh por ajo heshtje ishte e tmerrshme”.
Berisha thotë se prindi pas asaj heshtjeje kërkoi ta sheh të vrarë djalin e tij.
“Mos me keqkupto komandant, se dua ta shoh a është vrarë ballë për ballë apo duke ikur”, rrëfen Berisha fjalët e prindit të dëshmorit.
Komandanti rrëfen tutje se edhe pasi e pa trupin e djalit të vrarë babai i tij i motivoi ushtarët tjerë për të vazhduar luftën.
“Mos qani, kam edhe dy djem. Së shpejti edhe ata do të vijnë në front. Pushka e tij nuk duhet të pushojë”, rrëfen tutje Berisha ngjarjen emocionuese
