Përleshjet mes të burgosurve në qendrat korrektuese në vendin tonë nuk janë edhe aq të rralla. Raste të tilla e incidente të tjera, siç është ikja e të dënuarve, e gjetja e substancave narkotike janë goxha të shpeshta. Një rast i tillë ka ndodhur gjatë ditës së djeshme në Qendrën e Paraburgimit në Prizren, por këtë herë viktimë është një zyrtar korrektues.
Burimet brenda Prokurorisë kanë bërë me dije se një zyrtar i Shërbimit Korrektues të Kosovës që punon në këtë qendër është sulmuar fizikisht nga një person, i cili ndodhej nën masën e ndalimit.
Siç mëson Sinjali, për motive akoma të panjohura, i dyshuari e ka goditur me grushte zyrtarin korrektues, duke i shkaktuar lëndime – për çka i njëjti është dërguar në spital për trajtim mjekësor.
Rasti është denoncuar menjëherë në Polici dhe në koordinim me Prokurorin e Shtetit janë ndërmarrë veprimet e nevojshme për inicimin e hetimit ndaj të dyshuarit.
Të njëjtat burime kanë konfirmuar se tashmë ndaj të dyshuarit është caktuar masa e paraburgimit lidhur me rastin për të cilin është ndaluar.
