Cristiano Ronaldo vazhdon të jetë një nga futbollistët më të përfolur në afatin kalimtar të kësaj vere.
Sulmuesi portugez besohet se ka kërkuar largimin nga Manchester United, teksa ai ende nuk ka filluar as stërvitjet me skuadrën angleze.
Derisa nga Ronaldo nuk është konfirmuar asgjë, spekulimet rreth të ardhmes së tij po vazhdojnë.
Televizioni portugez “Sport TV” së fundi ka raportuar se Sporting Lisbona është në bisedime për huazimin e 37-vjeçarit.
Raportimi i tyre bazohet në një fotografi, ku shihet vetura e Ronaldos në garazhin e stadiumit të klubit portugez, “Jose Alvalade”.
Kujtojmë se Ronaldo nga viti 1998 deri më 2003 ka qenë pjesë e Sportingut. Ai kishte debutuar me skuadrën e parë në vitin 2002.
Ndryshe, pesë herë fituesi i “Topit të Artë” me Manchester Unitedin ka kontratë të vlefshme për së paku edhe një sezon.
Chelsea, Bayern Munich dhe Paris Saint-Germain janë gjithashtu klubet e lidhura me një transferim të Ronaldos.
