Skuadra e Jose Mourinhos e ka nisur me një barazim sezonin e ri kundër skuadrës së Salernitanas. Belotti (17’, 82’) shënoi dy golat për Romën kurse për Salernitan shënoi Antonio Candreva (36’, 49’).
Roma nuk e ka filluar mirë sezonin e ri, pasi që ka barazuar në shtëpi kundër skuadrës së Salernitanas me rezultat 2-2.
Fillimi i ndeshjes ishte më dinamik për Romën me Belottin që shënoi një gol që në minutën e shtatë por që ju anulua nga VAR pasi që italiani ishte në pozitë jashtëloje.
Mirëpo Belotti do të shënonte në minutën e 17 pasi që mori një top në zonë nga Llorente dhe arriti që të lirohet mirë për të shënuar golin e parë në këtë ndeshje.
Salernitana reagoi pas golit të pësuar dhe ishte skuadër më e mirë e ku shënoi gol në minutën e 36-të.
Ishte Antonio Candreva që u lirua mirë nga këndi i majtë i fushës për të goditur me të djathtën e tij dhe shënuar një gol të bukur për skuadrën e tij.
Pjesa e parë përfundoi me rezultat 1-1.
Salernitana do ta niste shumë më furishëm pjesën e dytë e ku Candreva do të ishte përsëri në qendër të vëmendjes.
Ish futbollisti i Milanit kësaj radhe u lirua nga ana e djathtë e fushës për të lansuar një goditje të fuqishme nga jashtë zonës me këmbën e majtë dhe shënuar gol në minutën e 49-të. Salernitana kështu përmbysi rezultatin e Romës dhe ishte në epërsi prej 1-2.
Hera e parë kur Roma reagoi në këtë ndeshje ishte minuta e 60-të kur Andrea Belotti përsëri sulmoi por u rrëzua në zonë dhe gjyqtari vendosi që mos të referoi penallti.
Rasti tjetër i Romës për të barazuar rezultatin erdhi në minutën e 78-të me anë të Stephan El Shaarawy. Italiani goditi topin por ai përfundoi vetëm në shtyllë të portës së Salernitanas.
Goli i barazimit erdhi në minutën e 82-të dhe atë pas një ndërprerje.
Parades krosoi nga goditja e këndit kurse Belotti si një nuhatës veteran i golit u lirua për të shënuar gol me kokë dhe barazuar rezultatin në 2-2.
Roma tentoi për të kaluar në epërsi në minutat e mbetur por nuk ia doli dhe në fund fitoi vetëm një pikë në përballjen e parë në sezonin e ri të Serie A.
Roma fitoren do ta kërkojë në ndeshjen e dytë, kur skuadra e Mourinhos do të udhëtojë për t’u përballur me Veronën kurse Salernitana luan ndeshjen e parë në shtëpi sezonin e ri kundër Udineses.
