Rifat Jashari, vëllai i komandantit legjendar Adem Jashari, gjatë ditëve të Epopesë së UÇK-së ka mirëpritur shumë mysafirë në kullën e tij në Prekaz.
Derisa ka pritur pedagogët ushtarakë që kanë trajnuar Adem Jasharin në Shqipëri, para mysafirëve, ai ka thënë se ka dhënë 56 anëtarë të familjes, por ka fituar 8 milionë shqiptarë.
“Përbesë kur vishin për ngushëllime në Mynhen atje profësorë e doktorë, shumë e shumë, edhe mu bë e tepërt. Thash o zotni, kurrkush nuk po thotë që janë pak, por i kam dhënë 56 , e i kam fitu 8 milionë shqiptarë, edhe qashtu më ka dalë.”, ka thënë Jasharaj.
Më 5 mars janë bërë 26 vjet nga rënia e komandantit legjendar Adem Jasharit, familjes së tij dhe Jasharëve të tjerë. Që nga viti 1991 deri më 1998, Prekazi dhe Drenica ishin të rrethuar nga forcat policore, ushtarake e paraushtarake serbe. Synimi ishte vrasja e komandantit të Ushtrisë Çlirimtare të Kosovës, Adem Jashari dhe familjes së tij, për të shuar dhe shtypur rezistencën që familja Jashari me në krye Ademin e Hamzën po i bënin regjimit të Sllobodan Millosheviqit.