“Hajde”, një prej gazetave online në gjuhën frënge që aktivisht përcjellë zhvillimet në Ballkan, ka publikuar një shkrim në të cilin përmenden gjashtë personazhe nga Ballkani, të cilat Hajde i konsideron si persona që po i japin një tjetër reputacion shqiptarëve nëpër botë.
“Hajde” thotë se përkundër luftërave dhe gjithçkaje që ndodhi në Ballkan viteve të fundit, sot ka emra në kulturë dhe kjo pjesë e Evropës po provon të qetësohet. Gjashtë yjet e Ballkanit, për Hajde.fr, janë Rita Ora, Era Istrefi, Dua Lipa, Bebe Rexha, Eliza Dushku dhe Inva Mula.
“Hajde” shkruan se të gjitha këto gjashtë emra, tri të parat nga Kosova e të tjerat nga Shqipëria, gjithmonë kanë cekur origjinën e tyre dhe kanë ruajtur thjeshtësinë në skenë, para publikut e audiencës.
Hajde shkruan një biografi për secilën prej artistëve, duke nisur me Rita Orën, duke përmendur hitet e Dua Lipës, duke krahasuar edhe njëherë Era Istrefin me emrat si Rihanna e Sia, për të vazhduar me Bebe Rexhën nga Dibra si krijuese të hitit “Monster” nga Rihanna dhe Eminem, shkruan KultPlus.
Eliza Dushkun gazeta online e përmend si një ndër aktoret shqiptare më të arrira në botë, dhe krejt për fund mbetet sopranoja Inva Mula, e lindur në Tiranë por një emër që ka rrokur skenat më të mëdha të muzikës klasike në botë.