Deputeti i Lidhjes Demokratike të Kosovës, Avdullah Hoti ka kritikuar Qeverinë e Republikës së Kosovës për rënie drastike të investimeve publike. Hoti ka publikuar një tabelë ku shihet se investimet për formimin e kapitalit kanë rënë nga 22.6 % sa kanë qenë në vitin 2019 në vetëm 9.7 % në vitin 2022.
Hoti thotë se kjo politikë e një qeverie të majtë çon në stagnim dhe prapambetje ekonomike. Sipas ish-ministrit të financave Kosova do të mbetet pas shteteve të rajonit me sasinë e kapitalit shoqëror për kokë banori.
Reagimi i plotë:
RËNIE DRASTIKE E INVESTIMEVE PUBLIKE NË FORMIMIN E KAPITALIT BRUTO GJATË QEVERISJES SË MAJTË
Ekonomia nuk zhvillohet kur investimet nga buxheti i shtetit për formimin e kapitalit bruto përgjysmohen si përqindje e shpenzimeve totale?!
Ja çfarë ka ndodhur gjatë qeverisjes së majtë – shihni figurën. Investimet për formimin e kapitalit kanë rënë nga 22.6% e buxhetit në vitin 2019 (viti para pandemisë) në vetëm 9.7% në vitin 2022.
Kjo politikë çon në stagnim e prapambetje ekonomike. Me këtë politikë Kosova do të mbetet edhe më shumë prapa vendeve të rajonit dhe më gjerë në sasinë e kapitalit shoqëror për kokë banori.
Kosova ka nevojë për investime masive kapitale për të rritur kapitalin shoqëror, i cili përfshinë rrugën, hekurudhat, infrastrukturën arsimore e shkencore, infrastrukturë shëndetësore, sistemet e shërbimeve publike të energjisë, ujit, ngrohjes etj.
Për shumë vite me radhë, investimet kapitale publike e kanë ndihmuar zhvillimin ekonomik duke ndërtuar infrastrukturën e nevojshme për të përmirësuar cilësinë e jetës së qytetarëve dhe për të ulur kostot e bizneseve. Në të njëjtën kohë, investimet kapitale kanë krijuar efekte multiplikuese në ekonomi që kanë krijuar cikël pozitiv të zhvillimit ekonomik.
*Viti 2020 ka qenë vit i pandemisë dhe arsyetohen shpenzimet e ulëta.