Blerim Isufaj nuk po e ka përkrahjen për t’u emëruar në pozitën e Kryeprokurorit të Shtetit, ndonëse emri i tij ishte më i votuari në radhët e Këshillit Prokururial të Kosovës. Pas këtij vendimi të KPK-së në adresën e presidentes Vjosa Osmani vërshuan kërkesa për të mos e dekretuar atë. Të zhgënjyer me konkursin u shfaqën edhe ndërkombëtarët. Ndërkaq, nga Presidenca thonë se ende nuk u është dërguar emri i Isufajt për dekretim.
Këshilli Prokurorial i Kosovës para dy ditësh ka votuar që Blerim Isufajn të jetë pasardhës i Aleksandër Lumezit në pozitën e Kryeprokurorit të Shtetit. Por, ky emër ende nuk është dërguar ende në Presidencë, shkruan Gazeta Express.
Këshilltari i Osmanit, Artan Murati tha mbrëmë se është herët të flitet për këtë çështje, pasi sipas tij, Presidenca ende nuk ka marrë ndonjë propozim konkret nga KPK-ja për emrin e Kryeprokurorit.
E në momentin kur të marrin propozimin, Murati tha se presidentja do të konsultohet me të gjitha palët për të dhënë vendimin e saj.
Emërimi ose jo i Isufajt Kryeprokuror i Shtetit, sipas Muratit nuk mund të konsiderohet si ndikim politik, pasi kjo është e drejtë kushtetuese e Osmanit.
“Në Këshillin Prokurorial nuk ka të drejtë të ndërhyrjes askush, por varet se çfarë konsideroni ndërhyrje. Nuk është ndërhyrje politike, pasi kjo ka të bëjë me ushtrimin e kompetencave ligjore dhe kushtetuese të presidentes, pasi ajo emëron kryeprokurorin, prokurorët, ambasadorët, komandantin e FSK-së, kryetarin e KQZ-së e kështu me radhë”, deklaroi ai në “Rubikon”.
Çështja e zgjedhjes së Kryeprokurorit të Shtetit ka ngjallur reagime të shumta në vend por edhe tek ndërkombëtarët.
Ndonëse KPK-ja vlerësoi se i tërë procesi për emërimin e Kryeprokurorit të ri të Shtetit, ka qenë objektiv, transparent, gjithëpërfshirës dhe i bazuar plotësisht në meritokraci, një gjë të tillë nuk po e thonë shoqëria civile dhe ndërkombëtarët.
Rrjedhimisht ata i kanë bërë thirrje Osmanit që të mos e dekretojë Isufajn për pozitën e Kryeprokurorit.
IKD, GLPS dhe Lëvizja FOL kanë reaguar pasi anëtarët e KPK-së e votuan unanimisht Blerim Isufajn për Kryeprokuror.
“Ky propozim për emërim të Blerim Isufajt si Kryeprokuror i Shtetit bëhet nga Këshilli Prokurorial megjithëse organizatat kyçe të vendit që merren me monitorimin e sistemit të drejtësisë, kishin tërhequr vërejtjen se procesi i përzgjedhjes së Kryeprokurorit të ri të Shtetit kishte një varg mangësish të cilat cenonin integritetin e procesit”, thuhej në komunikatë.
Edhe Bashkimi Europian dhe specifikisht Gjermania e Shtetet e Bashkuara të Amerikës e konsiderojnë befasuese, zhgënjyese dhe shqetësuese mënyrën se si Këshilli Prokurorial e ka zgjedhur Blerim Isufajn për Kryeprokuror të Shtetit.
Shefi i Zyrës së Bashkimit Europian në Kosovë, Tomas Szunyog reagoi i befasuar pas mbledhjes së KPK-së të mërkurën.
“Pavarësisht thirrjeve të vazhdueshme për të siguruar një përzgjedhje fer, transparente dhe të bazuar në merita, të kryeprokurorit të Shtetit, Këshilli Prokurorial i Kosovës e përmbylli procesin duke mos i respektuar këto parime. I befasuar dhe i zhgënjyer me veprimet e KPK-së”, tha Szunyog përmes një reagimi në Tëitter.
Ambasadori gjerman në Prishtinë, Jorn Rohde, shprehu po ashtu zhgënjimin e tij për vendimin e KPK-së për ta zgjedhur Blerim Isufajn Kryeprokuror.
“Kjo është me të vërtetë zhgënjyese dhe jo rruga e duhur për të ecur përpara. Sidomos kur OJQ-të e njohura të Kosovës, si Instituti i Kosovës për Drejtësi dhe GLPS, kanë shprehur shqetësime të ngjashme”, shkroi Rohde.
Ndërsa, ambasadori i SHBA-së në Kosovë, Jeffrey Hovenier, tha sot se pritjet e SHBA-së në këtë proces kanë qenë që ai të jetë “i drejtë, objektiv, transparent dhe i bazuar në merita”.
“Fakti që anëtarët e KPK-së nuk i kanë marrë parasysh ankesat legjitime dhe rekomandimet e Panelit Shqyrtues nuk përmbushin këtë standard. SHBA-ja nuk ka pasur një kandidat të preferuar dhe as nuk kemi paragjykuar kualifikimet individuale të kandidatëve”, tha Hovenier përmes një postimi në Tëitter.
Ambasadori Hovenier tha se prezenca e përfaqësuesve të ambasadës gjatë seancës së 6 prillit, ku KPK-ja në mënyrë unanime nominoi Blerim Isufajn për postin e kryeprokurorit të Shtetit, nuk duhet të shihet si mbështetje e SHBA-së për këtë proces.
“Ne jemi të shqetësuar me mënyrën KPK-ja ka kryer këto procedura dhe ka dëmtuar besimin e publikut të Kosovës dhe besimin tonë ndaj KPK-së si institucion publik”, tha Hovenier./Gazeta Express.