Milot Rashica ka qenë përsëri protagonist i Galatasarayt në fitoren e radhës, 4:1 në udhëtim ndaj Alanyasporit.
Futbollisti kosovar e realizoi golin e katërt dhe të fundit të ekipit nga Stambolli, duke arritur kështu në kuotën e katër golave në Superligën turke krahas dy të tjerave që i ka realizuar në Kupën e Turqisë.
Vushtrriasi ndihet i lumtur që po mund ta ndihmojë Galatasarayn, i cili është lider i padiskutueshëm në ligën elitare turke.
Futbollisti në pronësi të Norwichit i ka motivuar edhe bashkëlojtarët e tij përmes një postimi në rrjetet sociale.
“Paraqitje solide e ekipit, ne duhet ta mbajmë këtë ritëm dhe këtë përqendrim. I lumtur që e ndihmova ekipin me një gol. Shkojmë përpara luanë, të gjithë së bashku”, ka shkruar përfaqësuesi kosovar.
Rashica e ka shprehur dëshirën për të qëndruar në klubin nga Stambolli për një kohë të gjatë, ani pse është vetëm i huazuar tek Galata për një vit.
Gjiganti turk është duke e shikuar mundësinë e blerjes së kartonit të futbollistit ofanziv, i cili i ka bindur drejtuesit e klubit me paraqitjet e tij./PrishtinaPress/