Pavarësisht rikthimit të Listës Serbe në institucionet e Republikës së Kosovës, Qeveria ende nuk ka caktuar një datë se kur do ta procedojë në Kuvend demarkacionin me Malin e Zi.
Në media janë dhënë disa data të ndryshme kur do të votohet demarkacioni, mirëpo zyrtarë në Qeverinë e Kosovës kanë deklaruar për Indeksonline se zyrtarisht ende asnjë datë nuk është caktuar.
“Përpos që ka vullnet të mirë për ta dërguar në Kuvend dhe pas porosive që zëvendës-ndihmës Sekretarin amerikan të shtetit, Hoyt Brian Yee u dha deputetëve, datë të përcaktuar nuk ka ende”, është thënë nga ky burim.
Ndërsa si arsye për mos vendosje të kësaj date ende, theksohet të jetë kthimi i dyshimtë i Listës Serbe, dhe se deputetëve kosovarë u duhet pak kohë për të vlerësuar nëse Lista Serbe e ka “përnjëmend” kthimin dhe përkrahjen për votimin e demarkacionit.
Ndër të tjerash kryeministri Isa Mustafa dhe disa përfaqësues të kabinetit të tij gjenden në Maltë deri të premten, gjë që sigurisht tregon qartë ende mos-vendosjen e një date.
Ndryshe, demarkacioni vazhdon të jetë ndër çështjet kyçe që lidhet ngushtë me liberalizimin e vizave si dhe me procedimin e shumë çështjeve të tjera të rëndësishme për vendin.
