Trouble, reperi nga Atlanta, i njohur për bashkëpunimet e tij me Drake, The Weeknd e të tjerë, është qëlluar me armë zjarri, si pasojë e të cilës e ka humbur jetën. Ai ishte 34 vjeçar.
Gjithçka ka ndodhur herët në mëngjesin e të dielës në një apartament në periferi të Atlantas, ku më herët është mbajtur një festë, ndërsa reperi e kishte vizituar një femër – raporton The Guardian.
Mariel Semonte Orr (emri i vërtetë i reperit) ka qenë ame femrën e paidentifikuar, kur autori, njëherësh person i afërt me femrën e përmendur, hyri dhe e qëlloi reperin në gjoks. Ai u transportua në spital nga ekipet emergjente, ku më pas ndërroi jetë.
Hetuesit e qarkut Rockdale kanë bërë të ditur se kanë marrë një urdhër për arrestimin e Jamichael Jones me akuzat për vrasje, hyrje me dhunë në shtëpi dhe sulm të rëndë, por ai është ende në kërkim. Dorasi dhe viktima thuhet se nuk njiheshin me njëri-tjetrin.
Trouble debutoi në skenën e repit në vitin 2011 me hitin “December 17th”, ndërsa në vitin 2018 publikoi albumin e tij kryesor, “Edgewood”, ku përfshihen emra botërorë, si Drake, The Weeknd, Offset, Fetty Wap dhe të tjerë.
Shumë yje u pikëlluan nga lajmi për vdekjen e tij, kurse Drake postoi një fotografi në Instagramin për të shprehur ngushëllime.
