Deputeti i PDK-së, Rashit Çalaj, e ka kritikuar fjalimin e kryeministrit të Kosovës, Albin Kurti, i cili në Kuvendin e Kosovës, kishte deklaruar se sa të jetë ai kryeministër, Blerim Isufaj nuk do të dekretohet si kryeprokuror.
Çalaj, tha se me këtë deklaratë, Kurti e ka sulmuar Kushtetutën e Kosovës, sepse sipas tij, kryeministri nuk duhet të përzihet në çështjet që nuk i takojnë.
“Ajo që Kurti, ka thënë që sa të është kryeministër, Isufaj nuk do të bëhet kryeprokuror, është atakim në Kushtetutën e Kosovës. Kushtetuta nuk e njeh kryeministrin as kryeparlamentarin, në çështjen e emërimit të kryeprokurorit. Kushtetuta e njeh vetëm presidenten dhe KPK-në. KPK e propozon dhe presidentja e aprovon apo jo”, ka thënë ai.
Ai po ashtu tha se Kurti nuk do duhej të fliste për gjykimet e përfunduara, për shkak se sipas tij vetëm prokurorët kanë të drejtë t’i rikualifikojnë lëndët.
