Flota Operative dhe punëtorët e Departamentit Mbështetës Operativ në Policinë e Kosovës po protestojnë sot (e martë) në vendet e tyre të punës, duke shprehur pakënaqësitë e tyre për pagat, përkatësisht për mosrregullimin e vlerës së koeficienteve të pozitave të punës.
Kryetari i Sindikatës së Policisë së Kosovës, Imer Zeqiri, ka thënë për KosovaPress se protesta do të vazhdojë deri në realizimin e kërkesave të punëtorëve.
Zeqiri: Punëtorët janë në protestë në vendin e punës
“Punëtorët e këtyre dy grupeve janë në protestë po rrinë në vendin e tyre të punës, nuk janë në protestë në rrugë me pankarta, por po protestojnë në vendin e punës. Kërkesa e tyre e vetme është që të bëhet klasifikimi në koeficient në bazë të profesioneve që i kanë. Kjo është kërkesë dhe premtim që i është dhënë para disa muajve që kjo do të bëhet apo premtim që nga implementimi i Ligjit të pagave deri më tani. Tanimë kanë kaluar 6 muaj e gjysmë dhe nuk është bërë ky përmirësim adekuat apo përmirësim sipas profesioneve që i kanë dhe ata janë në vendin e punë jo në protestë. Janë në pritje se do të reflektojë dikush nga qeveria apo më konkretisht më thënë nga Ministria e Punëve të Brendshme të vijë dikush, por nëse nuk kemi një reflektim nga kjo ministri të gjithë këta punëtore janë të vendosur që të vazhdojnë më proteste deri sa të marrin një përgjigje konkrete”, thekson Zeqiri.
Kreu i kësaj sindikate i ka bërë thirrje institucioneve relevante që të reflektojnë dhe të qetsojnë këtë situatë për normalizimin e punës në polici.
Zeqiri: I bëj thirrje institucioneve që të reflektojnë për realizmin e kërkesave
“Zgjidhja e përmbushjeve të kërkesave të tyre, d.m.th. zgjidhja është dikush nga Ministria e Punëve të Brendshme të vijë dhe të tregojë konkretisht se nga cila datë do të bëhet përmirësimi apo vlerësimi në koeficient i të gjithë këtyre profesionistëve të cilët janë në protestë, kjo të ishte zgjidhja më e mirë. I bëjë thirrje që të reflektojnë në këtë drejtim dhe të qetësojnë situatën dhe të funksionojnë normalisht në punën dhe detyrat tona të rregullta, sepse mos funksionimi këtyre dy njësive pengon shumë edhe zhvillimin e apo kryerjen e detyrave të rregullta edhe në pjesën tjetër të policisë së Kosovës. Nëse nuk do të qetësohet situata me këta punonjës, pakënaqësitë do të rriten, do të zgjerohen kemi paralajmërim edhe nga pjesëtarët e tjerë të shërbyesve civil që do t’i bashkëngjiten protestës, edhe ata i kanë të njëjtët protesta dhe të njëjtët halle dhe kjo mundë të na vije deri të një bashkëngjitje e të gjithë pjesëtarëve të Policisë së Kosovës”, theksoi ai.
Ligji për paga, i cili është në fuqi nga muaji shkurt, kishte përcaktuar vlerën e koeficientit të pagës në sektorit publik 105 euro.
Megjithatë, ky ligj është në Gjykatën Kushtetuese të cilin më 7 prill të këtij viti Avokati i Popullit e ka dërguar në Kushtetuese.
Lidhur me këtë, Avokati i Popullit kishte pranuar ankesa nga Këshilli Prokurorial i Kosovës, Këshilli Gjyqësor i Kosovës, zyrtarë komunal të arsimit, infermierë, mjekë, Sindikata e Policisë së Kosovës, Komisioni Qendror i Zgjedhjeve dhe institucione e organizata të tjera.
