Paris Saint-Germain ka siguruar titullin e Ligue 1 për sezonin 2024/25 pas një fitoreje 1-0 në shtëpi ndaj Angers SCO, falë një goditjeje fluturimthi nga Désiré Doué. Me këtë fitore, PSG bëhet skuadra e parë në elitën e futbollit francez që nga sezoni 1994/95 që nuk pëson humbje në 28 ndeshjet e para të kampionatit.
Në “Parc des Princes” mbretëronte një atmosferë festive teksa PSG kërkonte të mbyllte llogaritë për titullin e 13-të kampion ndaj Angers. Megjithatë, mysafirët ishin pranë surprizës që në fillim, kur Willian Pacho pengoi Esteban Lepaul brenda zonës, por gjyqtari Marc Bollengier nuk dha penallti, pavarësisht protestave të skuadrës mike.
PSG mori kontrollin e topit dhe nisi të rrezikojë portën e Angers, por nuk pati të njëjtin efektivitet si në tri ndeshjet e fundit, ku kishte shënuar 13 gola. Gonçalo Ramos humbi një rast të artë duke goditur jashtë nga vetëm gjashtë metra, ndërsa Vitinha iu afrua golit me një goditje nga distanca, që u ndal me vështirësi nga portieri Yahia Fofana para pushimit.
Pasi nuk gjeti golin në pjesën e parë, PSG zhbllokoi rezultatin menjëherë në fillimin e pjesës së dytë, në ndeshjen e 12-të radhazi në shtëpi ku shënon e para, kur Doué finalizoi me një volej krosimin e Khvicha Kvaratskhelias nga afër. Pas golit, pasuan disa raste për vendasit, me Fabian Ruiz që pati mundësinë më të mirë për të dyfishuar, por goditja e tij u ndal nga Fofana me një pritje instinktive.
PSG e Luis Enrique-s siguron titullin e kampionit me gjashtë ndeshje të mbetura, por ambiciet e tyre mbeten të mëdha edhe në UEFA Champions League dhe Kupën e Francës. Në anën tjetër, Angers mbetet në krizë dhe në rrezik për rënie nga kategoria, pas pesë humbjeve radhazi në Ligue 1 pa shënuar asnjë gol – një statistikë e zymtë që nuk ishte përsëritur që nga maji i vitit 1980.
