Kryeministri i Kosovës, Albin Kurti, sot është pyetur lidhur me momentin e djeshëm ku është parë në një diskutim të tensionuar me presidenten Vjosa Osmani.
Kurti ka thënë se zëdhënësi i Qeverisë, Perparim Kryeziu, ka treguar se çfarë kishte ndodhur mes tyre.
“S’ka të bëjë më atë, ka folur Perparim Kryeziu pse është”, ka thënë Kurti, i pyetur pse të nerovozi presidentja.
Kryeziu dje duke parë raportimet e mediave, ka shkruar se diskutimi mes Kurtit dhe Osmanit ka qenë lidhur me avokatin e Popullit, Naim Qelaj dhe fjalën e këtij të fundit në mbledhjen e Këshillit për Demokraci.
“Në fjalën e tij sot në mëngjes, në mbledhjen e Këshillit për Demokraci dhe të Drejta të Njeriut, Kryeministri Albin Kurti, përveç tjerash, tha se 10 ligje të Kuvendit që përbëjnë reforma tejet të rëndësishme në përputhje me ndryshimin e madh demokratik zgjedhor të shkurtit 2021 me slloganin “Drejtësi dhe Punësim”, janë të ngujuara, të rrëzuara ose të deformuara te Gjykata Kushtetuese. Kur pas Kryeministrit e mori fjalën Avokati i Popullit, Naim Qelaj, ai filloi të përsiatej qysh po mendon ta dërgojë edhe një ligj tjetër në Gjykatën Kushtetuese, kësaj radhe Ligjin e ri për Zgjedhje, që u votua në lexim të dytë në Kuvend sivjet më 8 qershor, u shpall në gazetën zyrtare më 3 korrik dhe hyri në fuqi më 18 korrik 2023. Në atë xhirim shihet Kryeministri Kurti duke i folur Presidentes Osmani për Avokatin e Popullit Qelaj dhe këtë çështje të fjalës së tij”, ka shkruar dje Kryeziu.
