Sot Sali Berisha do duhet të paraqitet në Prokurorinë e Tiranës për të dëshmuar atë që ndodhi në protestën e thirrur prej tij më 8 janar para selisë blu.
Në kuadër te hetimeve të nisur mbi ngjarjet e dhunshme në selinë e PD, prokuroria përveç Sali Berishës i ka dërguar thirrje për t’u paraqitur dhe marrë në pyetje sot dhe deputetit Flamur Noka.
Ndërkohë vetëm 24 orë më pas do jetë radha e kreut të PD-së, Lulzim Basha dhe Sekretarit të përgjithshëm Gazmend Bardhi, që të paraqiten në prokurorinë e Tiranës pasi edhe ndaj këtyre të dyve është lëshuar nja fletë thirrje për tu marrë në pyetje.
Teksa Sali Berisha “shpëtoi” nga procedimi ndonëse ishte organizatori i protestës, nuk ka ndodhur kështu me Flamur Nokën i cili ishte në listën e personave të vënë nën hetim për dhunën tek selia e PD-së më 8 janar. Nga ana tjetër brenda selisë prokuroria ka nisur procedim penal për Gazment Bardhin.
Dyer të shkatërruar, dritare të thyera, gurë e shkopinj, kjo është panorama që la pas 8 Janari, ndërsa pas kërkesës nga deputetët demokratë që ishin brenda selisë, u desh ndërhyrja e policisë për të shpërndarë turmën e irrituar që kërkonte largimin me forcë të Lulzim Bashës.
Një ditë më parë Gjykata la të lirë 34 personat e arrestuar më 8 janar, ku vetëm 5 prej tyre u lanë nën masën e sigurisë “arrest në shtëpi” ndërsa pjesa tjetër ka detyrimin të paraqiten në polici.
23 prej të arrestuarve ishin pjesë e grupimit të Sali Berishës që rezultoi me një dhunë ndaj godinës së PD-së. Ndërkohë 11 të tjerë ishin persona që përkrahën Bashën dhe iu kundërpërgjigjën sulmeve nga brenda selisë.
Protesta e së shtunës kishte si objektiv marrjen e kontrollit të selisë së Partisë demokratike nga ana e Berishës dhe mbështetësve të tij. Dhuna e shpërthyer u frenua vetëm nga ndërhyrja e forcave të policisë.
Ngjarjet e 8 janarit bënë që dy ditë më parë kryesia e PD-së të vendoste përjashtimin e zotit Berisha nga anëtarësia e kësaj force politike. 9 deputetë të tjerë po ashtu u përjashtuan apo pezulluan, një masë që u shtri dhe ndaj 19 mbështetësve të ish kryeministrit, anëtarë të Komisionit të Rithemelimit.