Prokuroria Themelore në Ferizaj ka reaguar ashpër ndaj deklaratave të ministrit të Brendshëm, Xhelal Sveçla i cilin tha se prokuroria dhe gjykata janë treguar të papërgjegjshme në rastet e mëparshme të Dardan Krivaqës.
Sipas tyre, “Këto deklarata janë të paqëndrueshme, shfaqin mosnjohuri elementare profesionale, janë krejtësisht tendencioze dhe kanë për qëllim dezinformimin dhe manipulimin e opinionit për përfitime politike”.
“Për dijeninë e Ministrit të Punëve të Brendshme, Prokuroria është organ kushtetues ndjekës dhe kompetencat e ndara duhet t’i dallojë dhe aq më shumë edhe t’i kuptojë. Po ashtu ia bëjmë me dije se Prokuroria Themelore në Ferizaj çdo herë ka ndërmarrë të gjitha veprimet e nevojshme ligjore ndaj të pandehurit D.K dhe se në të gjitha rastet ndaj tij ka ngritur aktakuza dhe të njëjtat i ka proceduar në Gjykatën Themelore në Ferizaj”, thuhet në komunikatë.
Tutje, ata shtojnë se “ju bëjmë thirrje bartësve të institucioneve ekzekutive që të përmbahen nga çfarëdolloj deklarimi i pamatur, i pakonfirmuar dhe tendencioz, sepse kjo qasje nuk iu shërben as atyre dhe as të vërtetës faktike”.
Ndryshe, Ministri i Punëve të Brendshme, Xhelal Sveçla ka thënë se dy hallka që kanë qenë të papërgjegjshme në rastet e Dardan Krivaqës e Arbër Sejdiut janë Prokuroria e Gjykata.
Ai tha se nuk mund të pajtohet me parullën e protestuesve, “Ministria i ka duart me gjak”, sepse siç tha ai, Policia e Kosovës ka arrestuar të dyshuarin për vrasjen e Marigona Osmanit në një kohë shumë të shkurtë.
“Është e drejtë e tyre për të protestuar, siç është e drejtë e tyre për të qenë të mllefosur siçjemi edhe ne për këtë ngjarje dhe të tjera të kësaj natyre. Nuk pajtohem me çdo parullë e kërkesë të tyre, por patjetër që pajtohemi që është e drejtë e tyre për të shpalosur këto kërkesa”, tha Sveçla.
I pyetur se me cilat parulla nuk pajtohet, Sveçla tha: “Ministria i ka duart me gjak” është çështje për të cilën nuk mund të pajtohet, sepse policia ka bërë arrestimin e e këtij krimineli të rrezikshëm”.
Ai u shpreh se hallkat tjera që janë treguar të papërgjegjshme janë Gjykata e Prokuroria.
“Policia e Kosovës në raport me këtë kriminel është sjelur ashtu siç është kërkuar, sipas indicieve të para, janë dy hallka tjera që kanë qenë të papërgjegjshme, që janë prokuroria e Gjykata”, u shpreh Sveçla.
Ministri i Punëve të Brendshme tha se “Kam krijuar grupin punues brenda Drejtorisë së Përgjithshme të Policisë së Kosovës, këtë e kam kërkuar nga drejtori që të hetoj në detaje të gjithë lëndën e vrasësit të Marigonës dhe bashkëpunëtorit të tij, që nga shkelja e parë ligjore e deri në vrasjen e saj”.
“Afatet janë urgjente, ata kanë mbetur të më njoftojnë për kohën e duhur. Për mua është me rëndësi që kushdo që është fajtor të identifikohet dhe të vihen para drejtësisë, te gjithë ata që kanë bërë lëshime, duhet të vihen para drejtësisë”, tha Sveçla.
