Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen raste ku viktima zakonisht janë gratë dhe vajzat që përjetojnë dhune psikike e fizike nga bashkëshortët e tyre dhe anëtarët tjerë të familjes.
Një rast i tillë ka ndodhur edhe dje në një familje në Prizren, ku një burrë dyshohet se ka ushtruar dhunë psikike ndaj bashkëshortes së tij, të cilës i ka shkaktuar shqetësim e frikë.
Rastin e ka denoncuar gruaja, e cila ka dhënë detaje për dhunën që ka përjetuar për shkak të mosmarrëveshjeve të vazhdueshme që ka pasur me burrin.
Ajo çka e bën edhe më të rëndë këtë rast është se i dyshuari është përdorues i narkotikëve dhe kjo situatë e ka alarmuar viktimën, e cila vendosi të kërkojë ndihmë nga Policia duke e raportuar rastin.
Denoncimi i viktimës ka aktivizuar Policinë, me ç’rast i dyshuari është arrestuar dhe shoqëruar në stacion policor, ku është intervistuar lidhur me rastin.
Pas përfundimit të procedurave policore, Prokurori i Shtetit ka urdhëruar që i dyshuari të dërgohet në mbajtje për 48 orë./PrishtinaPress/
