Sulmuesi i Francës, Kylian Mbappe e ka quajtur klubin e tij, Paris St-Germain, “përçarës” pasi dyshimet intensifikohen për të ardhmen e tij te kampionët francezë.
24-vjeçari, kontrata e të cilit me PSG skadon në vitin 2024, i bëri komentet për revistën France Football.
Golashënuesi më i mirë i të gjitha kohërave i PSG-së i ka thënë klubit se nuk do të nënshkruajë një marrëveshje të re.
“Mendoj se të luash për PSG-në nuk ndihmon shumë sepse është një skuadër përçarëse, një klub përçarës”, raportohet të ketë thënë Mbappe.
Kryetari i Paris St-Germain, Nasser Al-Khelaifi tha se nuk do të lejonte që Mbappe të largohej si një transferim i lirë kur kontrata e tij të skadonte verën e ardhshme.
Mbappe, i cili ka fituar Ligue 1 pesë herë me PSG-në që kur u bashkua nga Monaco në vitin 2017, shënoi 41 gola në të gjitha garat sezonin e kaluar teksa ndihmoi klubin të arrinte titullin e 11-të të ligës.
Por ata edhe një herë dështuan në përpjekjen e tyre për sukses në Ligën e Kampionëve pasi u eliminuan herët nga Bayern Munich.
“Bëmë atë që mundëm”, tha Mbappe. “Duhet të flisni me njerëzit që bëjnë ekipin, që organizojnë skuadrën, që ndërtojnë këtë klub”.
Luis Enrique u emërua trajner javën e kaluar, duke zëvendësuar Christophe Galtier dhe merr përsipër një skuadër në tranzicion.
PSG tashmë ka lejuar fituesin argjentinas të Kupës së Botës, Lionel Messi, 36 vjeç, të bashkohet me skuadrën e MLS, Inter Miami, ndërsa e ardhmja e sulmuesit brazilian, Neymar, 31, është gjithashtu në dyshim.
