Disa politikanë serbë kanë njoftuar dje per vdekjen e ish-senatorit dhe prokurorit zviceran Dick Marty, i cili si raportues special i Këshillit të Evropës ka hetuar krimet e Ushtrisë Çlirimtare të Kosovës (UÇK).
Kryetarja e partisë Zavetnici, Milica Gjurgjeviq Stamenkovski, në rrjetin social X ka shkruar se Marti ka qenë prokuror që ka bërë kallëzim për krimet e UÇK-së – kidnapime, vrasje dhe trafikim organesh në “Shtëpinë e Verdhë”.
“Në Serbi emri dhe mbiemri i tij do të jenë sinonim i drejtësisë dhe i së vërtetës. Unë propozoj që një rrugë në Beograd të emërtohet me emrin e tij”, tha Gjurgjeviq Stamenkovski.
Presidenti i fundit i Partisë Popullore, Vuk Jeremiq, shkroi shkurt “U prehsh në paqe Dik Marti (1945-2023)”.
Edhe zyrtari i Partisë Popullore Stefan Jovanoviq ka shkruar se Marti ishte autor i një raporti për trafikimin e organeve në Kosovë “në të cilin ishte përfshirë UÇK-ja terroriste”.
“Një herë ai zbuloi një raport për përfshirjen e anëtarëve të UÇK-së në rrëmbime, vrasje dhe trafikim organesh të serbëve në Kosovë dhe në “Shtëpinë e Verdhë” në Shqipëri”, tha Jovanoviq.
Ish-ministri për përkujdesje familjare dhe demografi, Ratko Dmitroviq, vlerësoi se Evropa nuk ka “asnjë person më të nderuar dhe as më të guximshëm” për ta zgjidhur “problemin e Kosovës” se Dik Marti.
“Atij i qoftë lavdia e përjetshme”. Serbëve u takon ta kujtojnë atë, përderisa kujtimi i tyre u shërben”, tha Dmitroviq.
Ish-senatori dhe prokurori zviceran Dick Marty, i cili si raportues special i Këshillit të Evropës ka hetuar krimet e Ushtrisë Çlirimtare të Kosovës (UÇK), ka vdekur sot në moshën 79-vjeçare, raportojnë mediat zvicerane.
Raporti i Martit i vitit 2010 ishte pika fillestare për hetimin që çoi në formimin e një gjykate speciale për krimet e UÇK-së në Hagë, e cila padit komandantët kryesorë të formacionit, përfshirë Hashim Thaçin, ish-presidentin dhe kryeministrin e Kosovës.
