Policia e Kosovës për rajonin e Gjakovës ka bërë me dije se ka identifikuar tre persona si të dyshuar për djegien e Muzeut të Vjetër të Muzikës në Gjakovë.
Në komunikatën e saj, policia bën me dije se të arrestuarit në lidhje me rastin janë të mitur, shkruan lajmi.net.
Të njëjtit, pas dëgjimit në prezencën e akterëve të nevojshëm, janë liruar në procedurë të rregullt.
Njoftimi i plotë nga Policia:
Stacioni Policor në Gjakovë, më datë 30.08.2023, në ora 18:30 është njoftuar se Muzeu i Vjetër i Muzikës në Gjakovë ishte përfshirë nga zjarri.
Të gjitha njësitet e nevojshme kanë dalë në vendin e ngjarjes. Përveç dëmeve materiale nuk ka pasoja në njerëz.
Për shkak të peshës së veprës dhe ndjeshmërisë, rasti ka kaluar për hetim në Sektorin e Krimeve të Rënda pranë kësaj drejtorie.
Më datë 31.08.2023, pas një pune intensive hetuesit policorë kanë arritur të identifikojnë tre persona të moshës së mitur, të dyshuar si kryes të mundshëm të veprës.
Pas dëgjimit të tyre në prezencën e akterëve të nevojshëm në konsultim me prokuroin e çështjes të njëjtit janë liruar në procedurë të rregullt.
