Gjuajtjet me armë zjarri janë bërë të shpeshta në vendin tonë, duke cenuar kështu sigurinë e qytetarëve të cilët ka rast kur mund t’u rrezikohet jeta si pasojë e plumbave qorr.
Nga të shtënat me armë zjarri u shqetësuan mbrëmë edhe banorët e fshatit Balloc të Podujevës.
Njësia policore që po patrullonte në atë zonë ka zënë në flagrancë një 26-vjeçar duke shtënë me armë zjarri në ajër. Në vendin e ngjarjes janë gjetur dhe sekuestruar katër gëzhoja të armës që dyshohet se u përdor në rast, ndërkohë që i dyshuari është arrestuar.
Policia në koordinim me Prokurorinë kanë kryer bastisje në shtëpinë e të dyshuarit, mirëpo nuk është gjetur asgjë e dyshimtë.
Pas arrestimit, i riu është shoqëruar në stacion policor ku është intervistuar lidhur me rastin.
Me urdhër të prokurorit, ai do të hetohet në liri nën dyshimet për kryerjen e veprave penale ‘Mbajtje në pronësi, kontroll ose posedim të paautorizuar të armës’ dhe ‘Përdorim i armës apo mjetit të rrezikshëm’./PrishtinaPress/
