Sot, policët e EULEX-it filluan të patrullojnë veriun në këmbë, kryesisht për të treguar praninë e tyre në vakuumin e sigurisë, por ata nuk mund ta marrin rolin e Policisë së Kosovës, tha për Kossev, kreu i EULEX-it, Lars Gunnar Wigemark.
“Rreth 135 policë të EULEX-it punojnë me turne në rajonin e Veriut. Prandaj ata nuk angazhohen përnjëherë në këtë numër, por punojnë me turne, para së gjithash kryejnë patrullime mobile, e nga sot kemi filluar edhe me patrulla këmbësore në Mitrovicë dhe në vende të tjera, për të treguar se ne jemi të pranishëm atje si polici”, tha Wigemark.
Ai rikujtoi se EULEX-i është përgjegjës i dytë në zinxhirin e sigurisë, i cili i ofron mbështetje policisë së Kosovës.
“Përgjegjësja kryesore në zinxhirin e sigurisë është Policia e Kosovës. Jemi të dytët në zinxhirin që reagojmë dhe deri diku mund t’i ofrojmë mbështetje policore Policisë së Kosovës. KFOR-i, në anën tjetër, është një forcë ushtarake dhe sigurisht që ata kanë polici ushtarake, por ata nuk janë të përfshirë në zbatimin e rendit dhe ligjit në asnjë mënyrë ushtarake, sepse ky nuk është mandati i tyre, dhe mandati ynë si EULEX është pikërisht të angazhohen në punët e policisë. Mirëpo, ka limite për ne, këtë e bëjmë në koordinim me policinë e Kosovës, nuk mund ta marrim përsipër punën e tyre dhe ta zëvendësojmë policinë e Kosovës”, ka shpjeguar ai.
Ai shtoi se stafi i mbetur në stacionet policore në të katër komunat po mundohet që me turne të zgjatura ta bëjë punën e tyre sa më mirë, por edhe të mbrojë vetë qytetarët.
“Nuk është një situatë e qëndrueshme afatgjatë dhe të gjithë po përpiqen të bëjnë më të mirën, prandaj mendoj se vetë qytetarët dhe komuniteti lokal po pyesin se çfarë do të ndodhë më pas. Madje, disa njerëz me të cilët fola kanë frikë se çfarë mund të ndodhë, veçanërisht në lidhje me sjelljen e policisë nga rajone të tjera, se mund të ketë tensione edhe më të mëdha, madje edhe konflikte nëse kjo ndodh. EULEX-i është i pranishëm kryesisht në kapacitetin e tij parandalues. Nuk jemi aty për të marrë detyrat e Policisë së Kosovës. Ne punojmë ngushtë me Policinë e Kosovës, koordinohemi edhe me ta, koordinohemi edhe me NATO-n dhe KFOR-in. Rreth një javë më parë, Policia e Kosovës kërkoi nga ne që të rrisim monitorimin e situatës, gjë që e bëmë. Kemi shtuar edhe numrin e njësive tona. Por në planin afatgjatë ne nuk mund ta marrim dhe zëvendësojmë Policinë e Kosovës.
Kreu i EULEX-it shpreson në bisedimet e vazhdueshme të ndërmjetësve evropianë me lidershipin kosovar dhe atë të Serbisë.
Wigermark konfirmoi se përfaqësuesi i Lartë i BE’së, Joseph Borrell dhe i dërguari për dialogun ndërmjet Kosovës dhe Serbisë, Miroslav Lajçak po punojnë fort për një zgjidhje që do të de-përshkallëzonte situatën në veri para 21 nëntorit.
“Shpresoj për një vendim më shpejt se sa më vonë, sigurisht sa më shpejt të jetë e mundur. E dimë që 21 nëntori është një nga afatet”, tha ai.
“Kur besimi prishet, ai tashmë është një recetë për konflikt,” paralajmëroi ai, duke shtuar se BE dhe të gjithë ata që mbështesin dialogun do të donin të shihnin paqe.
Nga ana tjetër, ai vlerësoi gjithashtu se fotografia në Veri nuk është “plotësisht e zezë”, dhe se shumica janë ata që duan të shmangin konfliktin. Këtë e mbështet edhe fakti se ka institucione që punonjësit nuk janë larguar dhe që janë shumë të rëndësishme për sigurinë e qytetarëve.
“Për shembull, qendra e paraburgimit në Mitrovicë është ende duke funksionuar, njerëzit punojnë pa dallim kombësie, pastaj zjarrfikësja në Mitrovicë dhe vende të tjera, nuk janë prekur nga bojkoti dhe tërheqja dhe mendoj se kështu do të mbetet”. Pra, nuk është një pamje krejtësisht e errët dhe dua të theksoj se ka ende një shumicë të atyre që nuk duan që situata të përshkallëzohet dhe të ndodhë një konflikt fizik”, thotë Wigemark.
Ai i tha Listës Serbe se është e rëndësishme të ruhet paqja në terren, por ky është një mesazh që, siç thekson ai, ua përcjell të gjitha palëve.
“Mesazhi im kryesor jo vetëm për Listën Serbe, por edhe për mbarë Kosovën, por edhe për komunitetin ndërkombëtar, është që të gjithë të qëndrojnë të qetë dhe të mos kontribuojnë në tensione në asnjë mënyrë, të shmangin çdo lloj retorike nxitëse. , qoftë nga liderët politikë apo nga rrjetet sociale dhe të shprehen ndryshe. Kjo është një situatë e ndjeshme, tensionet janë të larta dhe mendoj se të gjithë duhet të bëjmë çmos për t’i ulur ato tensione”.
“Nuk mund të kesh një sistem tjetër, nuk mund të kesh një sistem paralel apo si të duash ta quash, edhe nëse herë pas here është realitet, sidomos në veri të Kosovës, por nuk është i qëndrueshëm në afat të gjatë. Nuk mund të kesh dy sisteme juridike të juridiksioneve të ndryshme në të njëjtin territor”, theksoi Wigemark.
