Mauricio Pochettino ka të ngjarë që të shkarkohet nëse Chelsea eliminohet nga Kupa FA, në përballjen e sotme ndaj Aston Villës.
Trajneri argjentinas është vënë nën presion pasi Chelsea u mposht 4:2 nga Wolves në Stamford Bridge të dielën, vetëm katër ditë pasi të kaltrit u mposhtën 4:1 nga Liverpool. Chelsea është në vendin e 11-të në tabelë dhe ka fituar vetëm nëntë nga 23 ndeshjet e tyre në Premierligë këtë sezon. Ata mund të përballen me më shumë vështirësi, kur të mërkurën kur do të vizitojnë Aston Villan në një ndeshje të dytë të raundit të katërt të Kupës FA, pasi ndeshja e parë përfundoi pa gola.
“Nuk do të habitesha nëse Chelsea shkarkonte Mauricio Pochettinon. Chelsea ka shpenzuar kaq shumë para për lojtarë – ata kanë lojtarë të mirë në ekip – por padyshim që nuk po funksionon,” tha ish-sulmuesi i Manchester United Berbatov për Betfair. “Ndeshja e fundit kundër Wolves, kur Chelsea humbi 4:2 në Stamford Bridge, ishte një shembull kryesor i kaosit që po ndodh në fushë. Sigurisht, nuk mund të heqësh qafe të gjithë ekipin. Trajneri është gjithmonë i pari që shkon. Pochettino gjithmonë është përpjekur të thotë se Chelsea ishte një projekt afatgjatë, por në futbollin modern, pronarët e klubeve nuk e kanë këtë. Nëse Chelsea humbet ndeshjen tjetër, mendoj se Pochettino do të shkarkohet.”
Chelsea ka kaluar nëpër katër trajnerë tashmë që kur Todd Boehly udhëhoqi blerjen e tyre në verën e vitit 2022 në një marrëveshje me vlerë deri në 4.2 miliardë funte (5.3 miliardë dollarë). Miliarderi amerikan shkarkoi Thomas Tuchel vetëm një muaj pas fillimit sezonit dhe më pas shkarkoi pasardhësin e tij Graham Potter më pak se shtatë muaj më vonë, duke vendosur Frank Lampard si trajner të përkohshëm deri në fund të sezonit 2022-23.
Boehly ka shpenzuar më shumë se 1 miliardë funte (1.3 miliardë dollarë) për transferime që kur mori kontrollin e Chelseat. Shpenzimet e egra të londinezëve do të thotë se ata mund të përballen me një akuzë nga Premierligë dhe të marrin pikë minus për shkeljen e rregullave financiare të fair playit , nëse nuk shesin lojtarë për tarifa të mëdha këtë verë.
Të mërkurën, Chelsea përballet me një skuadër në formë si Aston Villa, e cila së fundmi mundi Sheffield United 5:0, për një vend në raundin e pestë të FA Kupës. Ndeshja e tyre e radhës në Premierligë është jashtë ndaj Crystal Palace të hënën.
