Sulmuesi anglez, Ronald Sobowale po shkëlqen këtë sezon më Malishevën në Albi Mall Superligën e Kosovës dhe kjo ka bërë që ai të vërshohet nga ofertat e shumta nga kampionate të ndryshme evropiane dhe aziatike.
Malisheva është rrugës pozitive për të mbetur edhe një sezon në Superligën e Kosovës, pas dy fitoreve radhazi së fundmi, ndaj Ferizajt dhe Drenicës në udhëtim.
Megjithatë, njëri nga më meritorët për të sezon pozitiv të Malishevës është padyshim sulmuesi anglez, Sobowale.
Sobowale po përjeton një super-sezon, ku ka shkëlqyer me paraqitje, por edhe ka kontribuar me nëntë gola dhe katër asistime deri tani në Superligë dhe dy gola në dy ndeshje në Kupë.
Sipas asaj që mëson Telegrafi, ndeshjet e mira dhe loja ekipore kanë bërë që sulmuesi anglez të përfundoj në radarin e klubeve jashtë Kosovës.
“Sobowale ka marrë ofertë prej Azisë para një muaji. Ishte ofertë e madhe financiarisht, por e refuzojë se synimi është të luajë në top ligat evropiane në të ardhmen. Ish-trajner i tij te Chelsea është te ai klub dhe e kërkoi që ta marrë”, ka thënë për Telegrafin një burim i afërt i Sobowales.
“Sobowale dhe rreth i tij gjithashtu refuzuan një top klub në Mal të Zi, pasi nuk do të shkoj në atë shtet, ndërsa po vëzhgohet edhe nga një klub elitar slloven”.
“Disa klube të Superiores në Shqipëri janë në bisedime. Një klub i Tiranës po e kërkon më intensivisht se të tjerët”, përfundoi burimi për Telegrafin.
Ndryshe, 25-vjeçari ka edhe pesë ndeshje në këtë sezon për të shtuar numrin e golave dhe asistime me Malishevën, ndërsa në sezonin e ri më shumë mundësi do të luajë në një kampionat më të fortë.