Shefi i grupit negociator serb për normalizimin e marrëdhënieve Kosovë-Serbi, Petar Petkoviq, ka deklaruar se “Kurti nuk do paqe”, dhe se ai qenka i “brengosur për zhvillimin e mëtejmë të situatës në Kosovë”.
Petkoviq ka thënë se kjo ishte përshtypja e parë e shefit të tij, Aleksandar Vuçiq, i cili ka thënë se “është i brengosur për rrugët e hapura për kriza të reja në veri të Kosovës”.
Ai ka shtuar se normalizimi i marrëdhënieve dhe diskutimet për këtë gati nuk ekzistojnë.
“Nga ana e Prishtinës ka mohim të gjithçkaje për çka jemi pajtuar në lidhje me marrëveshjet për Asociacionin, e dëgjuam dje Kurtin duke thënë se nuk ka ekip menaxhues për të, dhe se ai nuk ka asnjë rol, edhe pse ka një marrëveshje e ndarë për mandatin e tij”, ka thënë Petkoviq.
Sipas fjalëve të tij, “ekipi menaxhues në vitin 2018 ka pasur katër muaj për të përgatitur dokumentin, i cili është bërë me përkushtim, dhe i cili bazohet në katër marrëveshje nga Brukseli”.
“Pala jonë i përmbahet dokumenteve të nënshkruara. E shihni këtë lloj hipokrizie, ata kërkojnë nga ne të respektojmë diçka që nuk është nënshkruar, edhe pse presidenti ynë e ka bërë të qartë se cilat janë vijat tona të kuqe dhe nga ana tjetër kemi katër marrëveshje të nënshkruara për të cilat Prishtina është zotuar, por se nuk duan t’i zbatojnë, për të mos përmendur se nënshkrimi i BE-së është vendosur edhe në marrëveshjen e Brukselit”, ka pretenduar Petkoviq.
Ai gjithashtu ka thënë se Kurti nuk dëshiron paqe, marrëveshje të reja dhe as Asociacion.
“Që kur ka ardhur në pushtet, ai përsërit se nuk e dëshiron formimin e Asociacionin. Është e nevojshme për ne, sepse ajo paraqet mekanizëm për mbrojtjen e të drejtave kolektive dhe individuale të serbëve në Kosovë. Kurti dëshiron të dëbojë popullin serb, prandaj ne po shkojmë nga kriza në krizë”, ka deklaruar Petkoviq.
Sipas fjalëve të tij, “Serbia nuk do të lejojë që Asociacioni të jetë në nivel të një organizate joqeveritare”, duke shtuar se ka 10 vjet që lufton për formimin e saj./PrishtinaPress/
