Drejtori i Zyrës për Kosovën në Qeverinë e Serbisë, Petar Petkoviq, lidhur me zgjedhjet në veri të Kosovës ka thënë se nuk ka asnjë shantazh nga Beogradi zyrtar.
Ai i është kundërpërgjigjur ministrit të Brendshëm të Kosovës, Xhelal Sveçla, që tha sot se “zgjedhjet do ta neutralizojnë shantazhin e Listës Serbe dhe Beogradit”.
“S’ka shantazh në Beogradi, por ka vetëm terror nga Prishtina”, është shprehur Petkoviq ndër të tjera.
Zgjedhjet e parakohshme lokale po mbahen sot në katër komunat me shumicë serbe në veri të Kosovës: Mitrovicë e Veriut, Zubin Potok, Zveçan dhe Leposaviq.
Komisioni Qendror i Zgjedhjeve vendosi kontejnerë nëpër rrugët kryesore në veri, që do të shërbejnë si qendra votimi. Policia e Kosovës tha se ka marrë të gjitha masat për një mjedis të sigurt gjatë procesit zgjedhor.
Në garë janë dhjetë kandidatë, prej të cilëve vetëm një nga komuniteti serb. Ajo është Sllagjana Pantoviq, kandidate e pavarur për kryetare të Komunës së Zveçanit.
Ndërsa Lista Serbe – partia më e madhe e serbëve në Kosovë – nuk merr pjesë në zgjedhje dhe u bëri thirrje qytetarëve serbë që ta bojkotojnë procesin. Thirrje të ngjashme bëri edhe Beogradi zyrtar.
Komunat në veri mbetën pa kryetarë nga nëntori i vitit të kaluar, kur përfaqësuesit serbë në atë zonë dhanë dorëheqje nga vendet e tyre të punës, për shkak të mospajtimit me një vendim të Qeverisë së Kosovës për riregjistrimin e makinave me targa ilegale serbe.
