Tarifa prej 10% e vendosur nga Presidenti i Shteteve të Bashkuara të Amerikës, Donald Trump, u bë mollë sherri, ndërmjet Presidentes së vendit Vjosa Osmani dhe qeverisë. Pa u bërë 24 orë nga vendimi i Trump, Osmani kërkoi nga Qeveria që t’ia heq tarifën ShBA-ve, sepse tek e fundit vendimi i Trump është reciprocitet.
Ministri në detyrë i Financave të Kosovës, Hekuran Murati, ka reaguar ndaj kërkesës së presidentes Vjosa Osmani për pezullimin e tarifës prej 10% për produktet nga Shtetet e Bashkuara të Amerikës. Ai ka theksuar se çështja është në shqyrtim të kabinetit qeveritar dhe se, sipas tij, politikat fiskale janë në fushën e ekzekutivit dhe jo në duar të mediave.
Murati kritikoi mënyrën se si Osmani e ka trajtuar çështjen, duke e postuar kërkesën në rrjetet sociale dhe pas orarit të punës.
Ai theksoi se vendimet e tilla duhet të merren institucionalisht dhe të komunikohen pas përfundimit të shqyrtimit.
Ndërkohë, këshilltari i presidentes për media, Bekim Kupina, e quajti përgjigjen e Muratit “të turpshme dhe skandaloze”, duke theksuar se kërkesa e presidentes ishte një veprim strategjik për forcimin e marrëdhënieve me SHBA-në, jo thjesht një çështje ekonomike.
Murati gjithashtu theksoi se, gjatë mandatit të tij, Qeveria ka pasur diskutime me përfaqësues të Departamentit të Tregtisë të SHBA-së për një marrëveshje tregtare të lirë, dhe shtoi se Kosova vazhdon të mbështesë idenë e një tregtie të lirë pa barriera me SHBA- në.
Kritikat e presidentit amerikan, Donald Trump, për tarifat ndaj vendeve të ndryshme përfshirë Kosovën, ka shkaktuar shqetësim në sektorin ekonomik të Kosovës, ku dhomat e tregtisë kanë kërkuar tërheqjen e tarifës ndaj SHBA-së.
Murati, megjithatë, ka theksuar se ndikimi ekonomik i tarifës ndaj Kosovës është i vogël, pasi Kosova ka një volum të vogël tregtar me SHBA-në.
Organizatat ekonomike në Kosovë kanë shprehur shqetësim për ndikimin që mund të ketë kjo tarifë në eksportet kosovare, të cilat kanë kanë shënuar një rritje të ndjeshme gjatë viteve të fundit, duke arritur në mbi 131 milionë euro në vitin 2022.
