Institucionet qendrore dhe lokale e kanë përkujtuar masakrën e Rezallës.
Në 26-vjetorn e kësaj masakre, është kërkuar drejtësi për viktimat e kësaj masakre.
Kryetari i Komunës së Skenderajt, Fadil Nura, ka vlerësuar se gjaku i këtyre martireve u bë dritë në rrugën e Kososvës për liri.
“Sot, me përulësi shprehim respektin e thellë para 98 martirëve të Masakrës së Rezallës, të vrarë e masakruar barbarisht me 5 prill 1999, nga forcat serbe, gjaku i të cilëve u bë dritë në rrugëtimin tonë të përvuajtur për të arritur lirinë e Kosovës. Lavdi për jetë e mot sakrificës së martirëve të Rezallës!”, ka shkruar Nura në profilin e tij në “Facebook”.
Masakra është përkujtuar edhe nga presidentja Osmani.
Ajo ka vlerësuar se më 5 prill 1999, në fshatin Rezallë të Drenicës, forcat e regjimit gjenocidal serb kryen një nga mizoritë më të rënda të luftës në Kosovë.
“Të rrethuar në shtëpitë e tyre, 98 djem e burra – banorë të Rezallës dhe të fshatrave përreth, u ekzekutuan në mënyrë çnjerëzore. Vrasja sikur nuk ju mjaftoi, ndaj zhdukën trupat e 44 prej viktimave, një akt tjetër i errët që synonte fshirjen e gjurmëve të gjenocidit. Disa prej këtyre trupave u gjetën vite më vonë në varrezat masive në Rudnicë të Rashkës, në territorin e Serbisë.” – ka shkruar Osmani.
Ajo tutje a thënë se masakra e Rezallës ishte pjesë e një plani sistematik të shtetit serb për shfarosje.
“Masakra e Rezallës ishte pjesë e një plani sistematik të shtetit serb për shfarosje , duke dëbuar me dhunë shqiptarët nga toka e tyre, nëpërmjet përndjekjes, vrasjeve masive, dhunimeve, djegieve dhe shkatërrimit. Ne nuk do të ndalemi së kërkuari drejtësi, sikurse as duke i kujtuar dhe nderuar përheherë. Lavdi përjetë martirëve të Rezallës!” – ka shkruar Osmani.
Për këtë masakër ka shkruar edhe deputetja e PDK-së, Blerta Deliu-Kodra.
“Në secilën pjesë të saj, toka e Drenicës është e mbushur me varre të të rënëve për liri. Në Rezallë janë 98 varre me trupat e njomë të fëmijëve, grave e burrave të Rezallës e fshatrave tjera përreth saj, të cilët janë vrarë e masakruar nga trupat serbe me 5 Prill 1999. Por, ky ishte çmimi i lartë që paguam për liri. Krenarë për të kaluarën, falënderues për kontributin e secilit, respektues për gjakun e Dëshmorëve dhe Martirëve. Lavdi të rënëve për liri”, ka shkruar ajo në profilin e saj në “Facebook”.
