Përgjime telefonike përfshirë edhe provat nga “Whats App”-i kanë qenë metodat e përdorura nga prokuroria e Prishtinës në arrestimin e 21 të dyshuarve për dallavere me subvencione.
Përmes përgjimit të bisedave në aplikacionin “Whats App” prokurori ka arritur që të konstatoj dyshimin se një fermer ishte futur në listën e përfitueseve edhe pse nuk i kishte plotësuar kushtet.
Në ketë rast përmes këtij aplikacioni janë paraqitur dyshimet se inspektori i AZHB-së, edhe pse ka qenë në dijeni se fermeri nuk kishte të mbjella me bimë mjekësore, kishte shënuar në raportin e kontrollit se i njëjti ka pasur 20 hektarë tw mbjella me këto bimë.
Nga provat e Whats App-it prokurori ka arritur që të zbuloj se në inspektori në koordinim me shefin e pagesave direkte e kishte futur në listën e përfituesve fermerin në fjalë edhe pse nuk i plotësonte kushtet.
Dosja voluminoze e Prokurorisë të cilën e ka siguruar KALLXO.com tregon se nga ekzaminimi i telefonave të disa prej të pandehurve të cilët ishin arrestuar muaj më parë, ka dalë se një numër i madh i zyrtarëve të AZHB-së kanë kërkuar dhe pranuar para nga fermer të ndryshëm për dhënien e subvencioneve.
Brenda kësaj dosjeje përshkruhet se si inspektorët merreshin vesh me fermerë që të ndanin vlerën e subvencionit e cila në disa raste shkonte deri në 70% për zyrtarët dhe 30% për fermerët.
Madje Prokuroria pretendon se zyrtarët e AZHB-së kishin përpiluar raporte të rreme deri në atë masë sa kishin përshkuar se në një vend në Istog ishin mbjellë grurë dhe misër në një sipërfaqe të madhe e cila ndodhej në pyll.
Përpilimi i raporteve të rreme të kontrollit, shtimi i numrit të bagëtive dhe shtimi i numrit të bletëve kanë qenë disa nga metodat të cilat dyshohet se janë përdorur nga Inspektorët e AZHB-së për të marrë ryshfet.
Dosja voluminoze e Prokurorisë të cilën e ka siguruar KALLXO.com, tregon për dyshimet se si inspektorët e ministrisë kishin përpiluar raporte të rreme kontrolli të cilat në të vërtetë nuk ekzistonin.
Përmes raporteve të rreme të përpiluara nga inspektorët e Ministrisë, fermerë të ndryshëm pasi kishin dhënë ryshfet dyshohet se kishin përfituar subvencione në vlerë prej qindra e mijëra eurove.
Mënyra më e shpeshtë e keqpërdorimit që dyshohet të jetë kryer, përmendet rritja e numrit të sipërfaqes me të mbjella e cila në realitet ishte shumë here më e vogël.
Përmes dhënies së ryshfetit për zyrtarë të AZHB-së, K.B dyshohet se kishte arritur që të përfitojnë mbi 370 mijë euro subvencione.
Mbi 200 mijë euro përmes kësaj skeme dyshohet ti ketë përfituar së bashku me bashkëshorten e vet fermeri B.Sh.
Njëjtë përfituan edhe fermerët H.K dhe F.M. Ata dyshohet se përmes kësaj skeme kishin arritur që të përfitonin secili mbi 100 mijë euro.
Për këto dyshime dy ditë më parë nën pranga përfunduan 21 persona në mesin e të cilëve edhe fermer që dyshohet se kishin përfituar subvencione duke dhënë ryshfet.
Kjo është vala e dytë e arrestimeve në rastin “subvencionet”. Në këtë rast nën pranga përfunduan Bejtulla Pira, Granit Abdyli, Valon Hoti, Enver Ibishi, Blerim Mulliqi, Kujtim Zariqi, Arsim Çela, Habibe Dauti, Musa Nivokazi, Lulzim Hajdaraj, Flamur Zeqiri, Blerim Asllani, Afrim Abazaj, Halil Krasniqi, Daut Kabashi, Bekim Shala, Salih Kelmendi, Gëzim Morina, Kastriot Berisha, Fuat Morina dhe Kumrije Maxharraj.
Muaj më parë në një aksion të gjerë policor të udhëhequr nga prokurori Rafet Halimi, ishin arrestuar zyrtarë të lartë të Ministrisë.
Dosja e prokurorisë tregonte se si një pjesë e këtyre zyrtarëve po thurnin planet për të përfituar më shumë në të ardhmen.
Përveç 11 personave të arrestuar muaj më parë, ishin sekuestruar edhe shuma të majme të parave që tejkalonin 600 mijë euro.
Një pjesë e këtyre parave, sipas Prokurorisë ishin gjetur në shtëpinë e vëllait të Luan Statovcit në Batllavë të Podujevës.
KALLXO.com e ka siguruar dosjen e Prokurorisë së Prishtinës ku shfaqën edhe planet e zyrtarëve të Ministrisë së Bujqësisë për të marrë ryshfet gjatë vitit 2021.
Në dosjen e siguruar thuhet se në zyrën e Statovcit përpos që është diskutuar për marrjen e ryshfetit nga aplikuesi V.K, janë thurur edhe plane për të marrë ryshfet gjatë vitit 2021.
Madje sipas Prokurorisë të dyshuarit Berat Nika dhe Hasan Maxharraj janë dëgjuar tek bëjnë plane që në vitin 2021 të marrin ryshfet shuma të parave prej 25 mijë eurove për aplikues.
Përpos Luan dhe Salih Statovcit të arrestuar deri më tani janë edhe zyrtari i pagesave direkte, Sadat Shkodra, zyrtari për zhvillimin e bujqësisë në Istog, Hasan Maxharraj, zyrtari i pagesave në AZHB, Berat Nika zyrtar për politika në Istog, Kushtrim Zogaj dhe inspektorja e AZHB-së Adushe Ukshini.
Prokuroria pretendon se ka siguruar prova të fuqishme në këtë rast, duke përfshirë fotografi dhe incizime të momenteve të dorëzimit të parave.
Pos tjerash, Prokuroria pretendon se ka arritur të sigurojë prova ku shihet se Adushe Ukshini e cila është inspektore në AZHB ka pranuar shuma të ndryshme si ryshfet dhe të njëjtat shihet duke ia dërguar drejtorit Luan Statovci dhe duke i ndarë mes vete.
Gjatë bastisjeve janë sekuestruar rreth 433,160 euro, 600 dollarë, 200 franga, 275 lira turke, 15 telefona, 8 vetura, një kompjuter, pesë armë, një USB dhe një vulë.