Kryetari i Rinisë Demokratike të Kosovës, anëtar Kryesisë së PDK-së, Donjet Bislimi në një konferencë për media, ka shprehur shqetësimin për gjendjen e rënduar, të krijuar nga pandemia COVID-19 dhe ka kërkuar nga Ministria e Shëndetësisë sigurimin e vaksinës anti-COVID, për shkak se në Kosovë është rritur numri i vdekjeve, duke tejkaluar shumë vende në botë.
Bislimi shprehu zemërimin ndaj Ministrisë së Shëndetësisë dhe Qeverisë së Kosovës, për keqmenaxhimin e spitaleve dhe gjithë sistemit shëndetësor.
“Mediat kanë dëshmuar tashmë për mungesën e kushteve bazike, të kontrolleve dhe izolimit të nevojshëm të spitaleve ku trajtohen pacientët e infektuar prej coronavirusit. Ndërkohë që gjasat janë të mëdha që kjo qeveri të dalë me suficit të madh për sa i përket shpenzimeve buxhetore, qytetarët nuk kanë oksigjen, i cili është vital për mbijetesën e të sëmururve, dhe detyrohen ta kërkojnë në treg privat. E njëjta situatë e rëndë shihet edhe me barna, ku Ministria e Shëndetësisë nuk ka marrë masa për të përmbushur nevojat e pacientëve, të cilët po detyrohen t’i blejnë barnat në treg të zi me çmime të larta. Ne si PDK jemi të shokuar nga mungesa e oksigjenit në spitalet tona dhe dikush duhet të jap përgjegjësi për këtë”, tha Bislimi.
Ai kërkoi llogari nga institucionet kompetente për krizën e krijuar si shkak i mungesës së oksigjenit për pacientët me COVID -19 dhe bëri thirrje për mobilizim të përgjithshëm për menaxhimin e kësaj krize.
“Në emër të Partisë Demokratike të Kosovës shpreh shqetësimin e madh për gjendjen e rënduar të pandemisë së COVID-19 dhe rritjen e numrit të vdekjeve duke tejkaluar shumë vende në botë. Përkeqësimi i situatës po tregon se masat aktuale të qeverisë nuk po funksionojnë ndërkohë që ekonomia është duke paguar kosto të përditshme si pasojë e masave jo-efikase bllokuese”, tha ai.