Prokuroria Themelore në Ferizaj ka njoftuar se ka arrestuar ish-kryetarin e Komunës së Shtërpcës, Bratislav Nikoliq dhe nëntë zyrtarë tjerë gjatë aksionit për ndërtime pa leje.
Sipas Rade Trajkoviqit, kryetares së “Lëvizja Evropiane e Serbëve”, këto arrestime në fakt do t’i ndihmojnë më së shumti serbët që të heqin qafe strukturat që keqpërdorin shuma të mëdha parash dhe Lista Serbe do të duhet të gjejë mënyra për të ndihmuar, për të ndjekur penalisht njerëzit që sot cilësohen si kriminelë, shkruan gazeta beogradase danas.
“Arrestimet nuk kanë qenë rrezik sigurie sepse nuk ka pasur situatë të ndërhyrjes me forcë. Së dyti, arrestimet janë multietnike. Këta janë njerëz që kishin mbrojte politike për një kohë të gjatë. Tani është një strukturë e re politike në Kosovë që dëshiron të arrijë liberalizimin e vizave. Pra, kjo nuk është e drejtuar kundër serbëve, përveç rastit që dikush ka vlerësuar se vetëm serbët mund të mbrojnë interesat serbe”, beson Rada Trajkoviq.
Siç vëren ajo, ky është një grup i kufizuar që kishte privilegje në para, media, komunikime ekskluzive me Beogradin. Ajo thotë se Prishtina ka filluar të ndjekë ashpër kriminelët pa dallim etnie.
“Kjo nuk duhet dhe nuk do të ketë pasoja në dialogun ndërmjet Beogradit dhe Prishtinës. Serbia duhet të ndihmojë në profilizimin e njerëzve të rinj në Kosovë, pasi tani është hapur hapësira e re për opsione të tjera. Askush nuk e pyet Aleksandar Vuçiqin nëse dëshiron ta bëjë këtë, mendoj se është e natyrshme që edhe Serbia nuk i pranon ata njerëz dhe ato lidhje me mafian. Serbia, qeveria duhet të mendojë seriozisht dhe t’i zgjidhë problemet që po ndodhin, por duhet të përgjigjet edhe opozita, kështu që Amerika nuk mund të na zgjidhë gjithçka. Pres që dikush seriozisht nga opozita të dalë dhe të thotë se gjërat do t’i ndryshojnë rrënjësisht”, përfundon Rada Trajkoviq.
Ndryshe, Nikoliq në vitin 2009 ishte kryetar i Komunës së Shtërpcës dhe njëkohësisht është anëtar i Listës Serbe.
