Sekretari britanik i Mbrojtjes Ben Wallace, i cili luajti një rol kyç në mbështetjen e Ukrainës përballë pushtimit rus dhe së fundmi kishte paralajmëruar se dëshironte të largohej nga posti i tij, ka dhënë zyrtarisht dorëheqjen, njoftoi sot Downing Street.
Wallace, 53, kishte njoftuar gjatë verës synimin e tij për t’u tërhequr nga jeta politike pas nëntë vitesh në qeveri, përfshirë katër në mbrojtje.
“Unë u zgjodha deputet në vitin 2005 dhe pas gjithë këtyre viteve është koha të investoj në aspekte të jetës sime që i kam lënë pas dore dhe të eksploroj mundësi të reja”, shkruan ai në letrën e dorëheqjes së tij të publikuar nga zyra e kryeministrit Rishi Sunak, i cili shumë shpejt do të shpallë emrin e pasuesit të ministrit të tij.
Wallace ka mbikëqyrur një nga përgjigjet më të forta ndaj luftës në Ukrainë në botë, me Mbretërinë e Bashkuar pas vetëm SHBA-së për sa i përket mbështetjes që nga fillimi i luftës, duke dhënë 4.6 miliardë paund ndihmë ushtarake.
Rishi Sunak, kryeministri, iu përgjigj lajmit duke thënë se Wallace “pa, përpara se të tjerët ta bënin, se cilat ishin qëllimet e vërteta të Vladimir Putinit në Ukrainë”.
“Vendosmëria juaj për të marrë armatimin e Kievit përpara se të sulmonin rusët kishte një efekt material në aftësinë e ukrainasve për të penguar pushtimin”, i tha Wallace në një letër.
Wallace akuzoi së fundmi Kievin se e trajton furnizimin me armë nga Perëndimi si një shërbim shpërndarjeje në Amazon, pasi u bënë sugjerime se ai priste më shumë “mirënjohje” nga Ukraina.
