Me urdhër të Prokurorisë Themelore të Ferizajt sot Policia e Kosovës vazhdoi operacionin “Brezovica”. Operacioni ishte i përfshirë në 10 lokacione të vendit.
Prishtina, Ferizaj dhe Shtërpca ishin disa nga lokacionet që u përmendën. Për ndërhyrjen në Shtërpcë së fundi kanë reaguar serbët.
“Përfaqësuesit e pushtetit në Prishtinë në vend që t’i urojnë serbët për festën e Krishtlindjes siç duhet, ata i kanë frikësuar besimtarët me armë”, thuhet në reagimin e Zyrës serbe për Kosovë, transmeton Insajderi.
Sipas kësaj zyre, kontrolli i sotëm nëpër shtëpitë serbe në Shtërpcë në ditën e Krishtlindjeve është presion dhe kërcënim i ri për ta.
Po ashtu, në reagim u akuzuan autoritetet kosovare se nën petkun e luftës kundër korrupsionit i frikësuan dhe u hakmorrën ndaj serbëve në prag të festës më të rëndësishme fetare.
Theksojmë se nga aksioni i sotëm i Prokurorisë Themelore të Ferizajt u arrestuan shtatë persona.
