Pak vende ku kosovarët mund të udhëtojnë pa viza – ja cilat janë ato!

Premtimi nga të gjitha pushtetet, që nga shpallja e pavarësisë së Kosovës, se banorët e shtetit më të ri në Evropë shumë shpejt do të udhëtojnë pa viza, tash e tetë vite ka mbetur e parealizuar.
Madje deri më tani “nuk kanë bërë punë” edhe “kërcënimet” e ish-ministrit të Punëve të Jashtme të Kosovës (MPJ) dhe presidentit aktual, Hashim Thaçi, se izolimi i kosovarëve është padrejtësi që po ia bën Bashkimi Evropian (BE) shtetit të Kosovës, dhe se ky largim mund t’i jap jetë forcave të cilat sipas tij, nuk ia duan të mirën vendit tonë.
Dëshpërueshëm për mosliberalizim të vizave, kishte folur edhe ish – ministri i Integrimit Evropian, Bekim Çollaku, i cili për më tepër kishte theksuar se as në 2016 kosovarët nuk mund të udhëtojnë lirshëm në zonën Schengen.
Por, sipas zyrtarëve të BE-së, liberalizimi i vizave për shtetin më të ri në Evropë, po ndodh sepse institucionet e Kosovës nuk po i realizojnë detyrat e shtëpisë, veçanërisht theksohet mungesa e luftës nga korrupsionit.
“Thembra e Akilit” dhe njëri prej kushteve tjera të vëna si kusht për liberalizim të vizave, është edhe demaskimi i kufirit në mes Kosovës dhe fqinjit të tij perëndimor, e që zgjidhja e tij nuk po duket në horizont, për shkak se dallimeve diametralisht të kundërta të pozitës dhe opozitës në Kosovë.
Ndonëse nuk kanë të drejtë të udhëtojnë pa viza në zonën Shchengen, banorët e shtetit të ri mund të udhëtojnë lirshëm në disa shtete.
Nga Ministria e Punëve të Jashtme (MPJ), kanë thënë se Kosova ka marrëveshje të lëvizjes së lirë me një sërë shtetesh të cilat lejojnë udhëtimin pa viza për qytetarët e Kosovës.
Sipas zyrtarëve të MPJ-së qytetarët e Kosovës mund të udhëtojnë pa viza në: Shqipëri, Maqedoni, Mal të Zi, Turqi, Dominika, Ekuador, Gambia, Haiti, Mikronezi, Niue, si dhe në Shën Vincent & Grenadines.
“Njëkohësisht, Kosova është në negociata me një sërë vendesh për ta hequr regjimin e dyanshëm të vizave, kur kjo të jetë në interesin e vetë shteteve. Përveç kësaj, një numër prej të paktën 29 shteteve të botës kanë lehtësuar në maksimum marrjen e vizave për qytetarët tanë. Qytetarët e Kosovës, mund të marrin viza në këto 29 shtete pas arritjes në aeroportin/pikën kufitare të shtetit përkatës”, kanë thënë nga MPJ.
Ata kanë sqaruar se hyrja e shtetasve të vendeve tjera në Kosovë – sipas vendimit të Qeverisë së Kosovës bazuar në marrëveshjet ndërshtetërore të arritura mes vendit tonë dhe disa shteteve të botës – hyrja në shtetin e Kosovës bazohet nëse shtetasit e këtyre vendeve kanë viza Shcengen ose në disa specifika tjera, siç është rasti me SHBA-të dhe vende të tjera.
“Shtetasit e vendeve për të cilët Republika e Kosovës aplikon regjim vizash, por të cilët kanë leje qëndrim biometrik valid të lëshuar nga njëri prej shteteve të zonës Schengen; po ashtu bartësit e vizës shumë-hyrëse të Schengenit, lirohen nga nevoja për t’u pajisur me vizë kosovare për hyrje, transit dhe qëndrim në Kosovë. Qëndrimi i tyre brenda territorit të Republikës së Kosovës kufizohet në 15 ditë”, ka sqaruar nga MPJ.