Deklaratave të zyrtarëve të LDK’së se transformimi i FSK’së në ushtri do të zgjas me muaj, u është përgjigjur shefi i grupit Parlamentar të PDK-së, Zenun Pajaziti.
Ky i fundit e pranon se për t’u formuar ushtria do të duhet kohë, por kjo siç thotë ai, ka të bëjë me me ngritjen e kapaciteteve, buxhetin dhe koordinimin me institucionet ndërkombëtare dhe partnerët.
Në një prononcim për Express të mërkurën, Pajaziti e quajti sfidë procesin që ka të bëjë me ndryshimet ligjore.
“Bërja e Ushtrisë do kohën e vet. Kjo ka te bëjë me ngritjen e kapaciteteve, buxhetin, koordinimin me institucionet ndërkombëtare etj. Ndërsa fillimi i procesit ka të bëjë me ndryshimet e nevojshme ligjore. Dhe kjo sfide është tani”, tha shefi i GP të PDK’së.
Pajaziti pret që për çështjen e ushtrisë të koordinohen të gjithë, përfshirë edhe partnerët e koalicionit.
“Pas nismës se Presidentit pritet qe te jap fjalën e vet Qeveria dhe te procedohet tutje ne Kuvend. Por, me e rëndësishmja është që në këtë periudhe vijuese të koordinohen të gjithë bashkë edhe me partnerët tanë në mënyrë qe Ushtria jonë te avancohet në të mirën e sigurisë për të gjithë qytetarët dhe rajonin”, shtoi ai.
Deputeti nga radhët e PDK-së thotë se beson në pjekurinë e duhur politike të të gjithë faktorëve politik.
